बुलढाण्यातील लोकांच्या केस गळतीचे कारण आले समोर; राशनचे गहू खाल्ल्यामुळेच पडू लागले टक्कल?

बुलडाण्यातील १५ गावांतील ३०० हून अधिक लोकांनी केस गळतीच्या तक्रारी केल्या असून त्यात गावातील सरपंचांचाही समावेश आहे. गव्हाचे नमुने घेऊन तपासणीसाठी पाठवले असता वर्नी अॅनालिटिक्स लॅबमध्ये त्याची पुष्टी करण्यात आली. अहवालानुसार, न धुतलेल्या गव्हामध्ये सेलेनियमचे प्रमाण ०.१ ते १.९ मिलीग्राम / किलो च्या सामान्य पातळीच्या तुलनेत १४.५२ मिलीग्राम / किलो आढळले. धुतल्यानंतरही ते केवळ १३.६१ मिलीग्राम / किलोपर्यंत कमी झाले, जे अद्याप धोकादायक होते.

सेलेनियम शरीरासाठी आवश्यक आहे, परंतु त्याचे जास्त प्रमाण हानिकारक असू शकते. बावस्कर यांच्या अहवालात असेही समोर आले आहे की, बाधितांमध्ये केसांच्या वाढीतील महत्त्वाचा घटक झिंकची तीव्र कमतरता होती. यापूर्वी इंडियन कौन्सिल ऑफ मेडिकल रिसर्चनेही (आयसीएमआर) लोकांच्या रक्तात सेलेनियमचे प्रमाण जास्त असल्याचे आढळले होते, परंतु त्यांनी थेट सरकारी गव्हाला दोष दिला नाही. बावस्कर म्हणाले की, पंजाबच्या काही भागात सेलेनियमयुक्त पुराचा परिणाम यापूर्वी पिकांवर दिसून आला आहे, त्यामुळे हाच विषारी गहू सरकारी पुरवठा साखळीत शिरला असावा, अशी शंका व्यक्त केली जात आहे.

बावस्कर यांनी यापूर्वी बुलडाण्यातील सार्वजनिक आरोग्याच्या मोठ्या समस्यांची तपासणी केली आहे. २०१० मध्ये त्यांनी जिल्ह्यातील २०० गावांमध्ये मूत्रपिंडाच्या आजाराच्या वाढत्या प्रकरणांची तपासणी केली असता तेथील पाण्यात कॅडमियम आणि शिसे धोकादायक प्रमाणात असल्याचे आढळून आले. सध्याच्या केसगळती प्रकरणात त्यांनी स्वत: ९२ हजार रुपये खर्च करून लॅब टेस्ट करून सत्य समोर आणले.