संभाजीनगर हादरलं! रात्री फिरत असताना नामांकित बिल्डरच्या मुलाचे अपहरण, काळ्या रंगाच्या कारमधून उचलून नेलं!

चैतन्य सुनील तुपे असे अपहरण झालेल्या मुलाचे नाव आहे. सुनील तुपे हे औरंगाबाद येथील मोठे बिल्डर आहेत. ते मंगळवारी रात्री चैतन्य सोबत फिरत होते. यावेळी, त्यांच्या घरापासून काही अंतरावर असणाऱ्या सेंट्रल मॉल येथून त्यांच्या मुलाचे अपहरण करण्यात आले. पोलिसांनी दिलेल्या माहितीनुसार, सुनील तुपे व चैतन्य तुपे हे दोघे घराबाहेर पडले होते. जेवण झाल्यावर ते दोघे घराजवळ फिरत होते. यावेळी सुनील तुपे हे चालत पुढे गेले होते. तर चैतन्य हा सायकलवर मागून येत होता. यावेळी अचानक एक काळ्या रंगाची कारमधून आरोपी आले आणि सुनील तुपे यांच्या समोर चैतन्यचे अपहरण करून घेऊन गेले. कार मधून आलेले आरोपी हे आधी जयभवानीनगरकडे गेले व त्यानंतर सिडकोमार्गे शहराबाहेर पळून गेले अशी माहिती आहे. या घटनेची दखल पोलिसांनी घेतली असून या कारचा आणि आरोपींचा पोलिस शोध घेत आहेत. परिसरातील सीसीटीव्ही पोलिसांनी तपासले आहेत.

दोन कोटी रुपयांची मागितली खंडणी

आरोपींनी सुनील तुपे यांच्याकडे तब्बल २ कोटी रुपयांची खंडणी मागीतल्याचे समोर आलं आहे. मुलाचे अपहरण केल्यावर आरोपींनी त्यांना २० मिनिटांनी फोन केला. यात त्यांनी २ कोटीं रुपयांच्या खंडणीची मागणी केली. पैसे मिळाले नाही तर मुलगा जिवंत मिळणार नाही अशी देखील धमकी आरोपींनी दिली आहे. त्यांनी जगा आणि वेळ देखील कळवणार असल्याचे सांगितले आहे.

पोलिसांनी फोन ट्रेस केल्यानंतर तो सिल्लोडजवळ बंद झाल्याचे तपासात पुढे आले आहे. मुलाचे वडिल सुनील तुपे हे बिल्डर असून त्यांच्याशी संबंधित सर्व जणांनी देखील कसून चौकशी केली अंत आहे. या साठी पोलिसांनी ४ पथके स्थापन केली असून हे पथक आरोपींचा शोध घेत आहेत.