राज ठाकरेंना मोठा धक्का! मतदानाला चार दिवस बाकी असताना मनसेचा उमेदवारच उद्धव ठाकरेंच्या शिवसेनेत

लोकसभा निवडणुकीत भाजपला बिनशर्त पाठिंबा देणारा राज ठाकरे यांचा पक्ष विधानसभा निवडणूक स्वबळावर लढवत आहेत. राज ठाकरे यांचे चिरंजीव देखील निवडणुकीच्या मैदानात आहेत. मनसेनं नाशिकमधील नांदगावमधून अकबर सोनावाला या मुस्लिम कार्यकर्त्याला रिंगणात उतरवलं होतं. मात्र, मतदान काही दिवसांवर असताना त्यांनी मनसेला 'जय महाराष्ट्र' केला आहे. सोनावाला यांनी उद्धव ठाकरेंच्या शिवसेनेची मशाल हाती घेतली आहे.

नांदगावमध्ये ठाकरेंच्या शिवसेनेकडून गणेश धात्रक मैदानात आहेत. तर, शिंदे गटाचे सुहास कांदे निवडणूक लढवत आहेत. तर, छगन भुजबळ यांचे पुतणे समीर भुजबळ यांनी अपक्ष अर्ज भरून प्रमुख पक्षांच्या उमेदवारांसमोर आव्हान निर्माण केलं आहे.

हेही वाचा: शरद पवारांनंतर मीच वाली! अजित पवारांच्या या विधानावर काका काय म्हणाले पाहा!

नांदगावमध्ये उद्धव ठाकरे यांची नुकतीच जाहीर सभा झाली. या सभेत गणेश धात्रक यांनी मनसेचे उमेदवार अकबर सोनावाला यांच्या प्रवेशाची घोषणा करून सर्वांनाच धक्का दिला. त्यामुळं आता इथं मनसेचा अधिकृत उमेदवारच राहिलेला नाही. अशा परिस्थितीत राज ठाकरे कोणाला पाठिंबा देणार याविषयी उत्सुकता आहे.

मनसेचे माजी महापौरही ठाकरेंच्या शिवसेनेत

नाशिक महापालिकेचे माजी महापौर व मनसेचे नेते अशोक मुर्तडक यांनी देखील उद्धव ठाकरे यांच्या उपस्थितीत शिवसेनेत प्रवेश केला. मुर्तडक हे नाशिकमधून आमदारकीच्या उमेदवारीसाठी इच्छुक होते. मात्र त्यांच्याऐवजी प्रसाद सानप यांना संधी देण्यात आली. त्यामुळं ते नाराज होते. मुर्तडक यांच्या रूपानं राज ठाकरे यांना पहिला धक्का बसला होता. त्यानंतर सोनावाला यांनी दुसरा धक्का दिला आहे.

हेही वाचा: म्हातारं म्हातारीला चोळी शिवू द्यायचं नाही; भाजप नेते पाशा पटेल यांचे जाहीरसभेत अश्लील हातवारे, पाहा व्हिडिओ