मला माफ करा, जाऊ द्या… पैसे वाटताना पकडल्यावर विनोद तावडे यांनी विनवणी केल्याचा हितेंद्र ठाकूर यांचा दावा

बविआचे नेते हितेंद्र ठाकूर यांनी सगळ्या प्रकरणावर जळजळीत प्रतिक्रिया दिली आहे. विनोद तावडे हे भाजपचे राष्ट्रीय नेते आहेत. ह्यांना काही लाजशरम नाही. मतदानाच्या ४८ तास आधी मतदारसंघ सोडायचा असतो हे त्यांना माहीत नाही का? ते राज्यात शिक्षणमंत्री होते ना, असा संताप ठाकूर यांनी व्यक्त केला आहे.

हेही वाचा: भाजप नेते विनोद तावडे यांनी हॉटेलमध्ये बसून ५ कोटी रुपये वाटल्याचा आरोप; विरारमध्ये भाजप-बविआमध्ये राडा

'भाजपचे लोक काहीही म्हणोत, आम्हाला डायऱ्या मिळाल्या आहेत. लॅपटॉपही आहे. पाच कोटींचं वाटप चालू आहे. कुठे-किती वाटप झालं त्याचीही माहिती आहे, असा दावाही ठाकूर यांनी केला.

तावडेंनी मला २५ फोन केले!

‘विनोद तावडे यांनी मला २५ फोन केले. मला माफ कर, जाऊ द्या. प्लीज मला माफ कर. माझं चुकलं. हे प्रकरण जास्त ताणू नका, अशी विनवणी ते मला करत होते, असं हितेंद्र ठाकूर यांनी पत्रकारांशी बोलताना सांगितलं. 'माझं फोन बुक बघा. त्यात अनेक इनकमिंग कॉल आहेत. मला आधीच माहिती मिळाली होती की विनोद तावडे हे ५ कोटी रुपये घेऊन येणार आहेत. भाजपचा राष्ट्रीय नेताच पैसे वाटायला आलाय. आता निवडणूक आयोगानं व पोलिसांनी योग्य ती कारवाई करावी, त्यानंतरच आम्ही सोडू. मी कायदे-नियम पाळणारा माणूस आहे, असं हितेंद्र ठाकूर म्हणाले.

हेही वाचा: बारामतीमध्ये नाट्यमय घडामोडी! युगेंद्र पवार यांच्या वडिलांच्या शोरूममध्ये मध्यरात्री पोलीस गेले! झडती घेतली! कारण काय?

विधानसभा निवडणुकीसाठी उद्या, बुधवार २० नोव्हेंबर रोजी मतदान होणार असून २३ नोव्हेंबरला निकाल लागणार आहे. राज्यात सत्ताधारी महायुती व विरोधकांच्या महाविकास आघाडीमध्ये जोरदार चुरस आहे.