बाबा सिद्दिकी हत्या प्रकरणात मोठे यश, मुख्य शूटर शिवकुमारला उत्तरप्रदेशातून अटक; नेपाळला जाणार होता पळून
राष्ट्रवादी काँग्रेसचे नेते आणि माजी मंत्री बाबा सिद्दीकी यांच्या हत्येप्रकरणी उत्तर प्रदेश एसटीएफ आणि मुंबई गुन्हे शाखेच्या संयुक्त पथकाने बहराइच जिल्ह्यातील नानपाडा येथून कथित मुख्य शूटर आणि इतर चार आरोपींना अटक केली आहे.
बाबा सिद्दीकी हत्या प्रकरणात पोलिसांना मोठे यश मिळाले आहे. मुंबई पोलीस आणि उत्तर प्रदेश पोलिसांच्या संयुक्त कारवाईत रविवारी (१० नोव्हेंबर) नानपारा बहराइच जिल्ह्यातून मुख्य आरोपी शिवकुमार उर्फ शिवा गौतम याला अटक करण्यात आली आहे. शिवकुमार नेपाळला पळून जाण्याच्या प्रयत्नात होता. मात्र त्याआधीच सापळा रचून त्याला अटक करण्यात आली. अनुराग कश्यप, ज्ञानप्रकाश त्रिपाठी, आकाश श्रीवास्तव आणि अखिलेशेंद्र प्रताप सिंग यांनाही शिवकुमारला आश्रय देणे आणि नेपाळला पळून जाण्यास मदत केल्याच्या गुन्ह्यात अटक करण्यात आली आहे.
अभिनेता सलमान खानचा जवळचा मित्र आणि राष्ट्रवादी काँग्रेसचे नेते झियाउद्दीन अब्दुल रहीम सिद्दीकी उर्फ बाबा सिद्दीकी याच्या हत्येतील मुख्य शूटर शिवकुमार गौतम उर्फ शिवा याला उत्तर प्रदेश एसटीएफने रविवारी संध्याकाळी अटक केली. शूटर शिवा लॉरेन्स बिश्नोई टोळीसाठी बराच काळ काम करत असून तो लॉरेन्सच्या खूप जवळचा आहे. शिवाला बहराइचहून नेपाळला घेऊन जाणाऱ्या अन्य चार तरुणांनाही एसटीएफने पकडले आहे. त्यापैकीच एक म्हणजे नेमबाज धर्मराज कश्यपचा भाऊ अनुराग, जो मुंबईत घटनास्थळीच पकडला गेला होता.
एसटीएफचे एडीजी अमिताभ यश यांनी सांगितले की, शूटर शिवकुमार गौतम उर्फ शिवासह अनुराग कश्यप, ज्ञान प्रकाश त्रिपाठी, आकाश श्रीवास्तव आणि अखिलेंद्र प्रताप सिंह या चार जणांना ही अटक करण्यात आली आहे. १२ ऑक्टोबर रोजी मुंबईत माजी मंत्री बाबा सिद्दीकी यांची तीन हल्लेखोरांनी गोळ्या झाडून हत्या केली होती. धर्रामज आणि गुरमेल सिंग या दोन शूटरना घटनास्थळीच पकडण्यात आले. त्यावेळी शिवकुमार फरार झाला होता. तुरुंगात असलेल्या लॉरेन्स विश्नोईच्या सांगण्यावरून ही हत्या करण्यात आली होती.
डेप्युटी एसपी परमेश कुमार शुक्ला यांनी दिलेल्या माहितीनुसार, या हत्येची रेकी शुभम सोनकर आणि पंजाबमधील जालंधर येथील रहिवासी मोहम्मद यासीन अख्तर यांनी केली होती. हत्येनंतर बराच वेळ शिवा हातात न आल्याने मुंबई गुन्हे शाखेने एसटीएफची मदत मागितली. मुख्य शूटर शिवा बहराइचच्या नानपाडा येथे लपून बसल्याची माहिती एसटीएफला मिळाली. शिवा सांगतो की तो आणि धर्मराज एकाच गावचे आहेत. तो पुण्यात भंगार विक्रीच्या दुकानात काम करत होता, तर त्याच्या शेजारीच शुभम सोनकर यांचे भंगाराचे दुकान आहे.
शुभम हा लॉरेन्स विश्नोई टोळीसाठी बराच काळ काम करत होता. त्याने लॉरेन्स विश्नाईचा भाऊ अनमोलला स्नॅप चॅटच्या माध्यमातून अनेकदा बोलायला लावले होते. बाबा सिद्दीकीच्या हत्येसाठी त्याला १० लाख रुपये मागितले होते. तसेच दरमहा स्वतंत्र रक्कम देण्याचे आश्वासन देण्यात आले होते. शुभम आणि यासीन या दोघांनी या तिघांना हत्येसाठी पिस्तूल, काडतुसे, सिम आणि नवीन मोबाइल दिला होता. बाबा सिद्दीकी यांची या तिघांनी १२ ऑक्टोबर रोजी हत्या केली होती.
हत्येनंतर त्याने आपला मोबाईल मुंबईतच फेकून दिल्याचे शूटर शिवाने एसटीएफला सांगितले. मुंबईहून ते पूना येथे पोहोचले आणि तेथून झाशीमार्गे लखनौमार्गे बहराइचला गेले. वाटेत तो दुसऱ्याचा मोबाईल मागवून आपल्या इतर सहकाऱ्यांशी बोलत राहिला. अनुराग कश्यपशी चर्चा केली असता त्याने सांगितले की, अखिलेंद्र, ज्ञान प्रकाश आणि आकाश यांनी नेपाळमध्ये लपण्याची व्यवस्था केली आहे. सर्वजण नेपाळला पळून जाण्याच्या प्रयत्नात होते पण त्यापूर्वीच त्यांना पकडण्यात आले.
