IMD Red alert : अति मुसळधार पावसाचा अंदाज! मुंबईतील सर्व शाळा, कॉलेजेस उद्या बंद राहणार, बीएमसीची घोषणा

परतीच्या पावसानं बुधवारी सायंकाळपासून महाराष्ट्रातील काही भागांत अक्षरश: धुमाकूळ घातला. मुंबईतही पावसाचा जोर प्रचंड होता. विजांच्या लखलखाटासह पाऊस कोसळत होता. सायंकाळी साडेसहा वाजण्याच्या सुमारास मुंबईत पावसाला सुरुवात झाली. हा पाऊस साडेनऊ वाजेपर्यंत न थांबता बरसत होता. त्यामुळं मुंबईतील अनेक भागांत पाणी तुंबलं. मध्य रेल्वेची लोकल सेवा पुरती विस्कळीत झाली. पावणे दहाच्या सुमारास पावसानं उसंत घेतली. भारतीय हवामान विभागानं उद्याही मुंबई व आसपासच्या जिल्ह्यांत अति मुसळधार पावसाचा इशारा दिला आहे.

मुंबई महापालिकेचं नागरिकांना आवाहन

पावसाचा हाच जोर उद्याही कायम राहणार आहे. हवामान विभागानं उद्या, सकाळी साडेआठ वाजेपर्यंत मुंबईसाठी रेड अ‍ॅलर्ट जारी केला आहे. त्यानंतर शाळा व कॉलेजातील विद्यार्थ्यांच्या सुरक्षेची खबरदारी म्हणून मुंबई महापालिकानं शहर व उपनगरातील शाळा, महाविद्यालयांना सुट्टी जाहीर केली आहे. नागरिकांनी स्वत:ची काळजी घ्यावी व आपत्कालीन परिस्थितीत तात्काळ मदतीसाठी १९१६ या क्रमांकावर संपर्क साधावा, असं आवाहनही महापालिकेनं केलं आहे.

हेही वाचा: पुण्यात धुवाँधार! पावसाने रस्त्यांना नदीचं स्वरूप, अनेक सोसायटींमध्ये शिरलं पाणी