Nagpur Riots : औरंगजेब कबर वादात VHP आणि बजरंग दलाच्या ८ कार्यकर्त्यांना अटक, स्वत: केले आत्मसमर्पण

या लोकांवर इतर धर्माच्या लोकांच्या भावना दुखावल्याचा आरोप आहे. नागपुरात आंदोलना दरम्यान मुस्लीम समाजातील लोकांचा जमाव घटनास्थळी पोहोचला आणि हिंसक झटापट सुरू झाली. त्यानंतर उसळलेल्या हिंसाचारात सुमारे डझनभर पोलिस जखमी झाले असून अनेक सामान्य नागरिकही जखमी झाले आहेत.

मध्य नागपुरात सोमवारी सायंकाळी साडेसातच्या सुमारास हिंसाचार उसळला आणि पोलिसांवर दगडफेक करण्यात आली. औरंगजेबाची समाधी हटवण्यासाठी उजव्या विचारसरणीच्या गटाने केलेल्या आंदोलनादरम्यान एका समुदायाचा धार्मिक ग्रंथ जाळण्यात आल्याची अफवा पसरल्यानंतर हा हिंसाचार उसळला. या हिंसाचारात तब्बल ३४ पोलिस जखमी झाले आहेत.

अनेक भागात कर्फ्यू -

शहरातील संवेदनशील भागात संचारबंदी लागू करण्यात आली असून, लोक आणि वाहनांच्या वाहतुकीवर निर्बंध घालण्यात आले आहेत. पोलिसांनी दिलेल्या माहितीनुसार, कोतवाली, गणेशपेठ, तहसील, लकडगंज, पाचपावली, शांती नगर, सक्करदरा, नंदनवन, इमामवाडा, यशोधरा नगर आणि कपिल नगर पोलिस ठाण्याच्या हद्दीत संचारबंदी लागू आहे. संचारबंदीच्या काळात संबंधित भागातील पोलिस उपायुक्त रस्त्यांवरील वाहनांच्या वाहतुकीबाबत निर्णय घेतील. अधिकाऱ्यांनी दिलेल्या माहितीनुसार, सोमवारी रात्री झालेल्या हिंसाचारात तीन पोलिस उपायुक्तांसह १२ पोलिस कर्मचारी जखमी झाले आहेत.