Yoga Mantra: ऑफिसमध्ये तासन् तास बसून लठ्ठपणा आणि आजारांना बळी पडलात? दिवसातून फक्त १० मिनिटं करा ही योगासनं
Yoga for Weight Loss and Healthy Life: तुम्हीही ऑफिसमध्ये जात असाल आणि तासन्तास लॅपटॉपसमोर बसून काम करत असाल तर या योगासनांना आपल्या रूटीनचा भाग बनवा. रोज त्यांचा सराव केल्यास लठ्ठपणा आणि इतर आजारांमध्ये बराच आराम मिळेल.
10 Minutes Yoga Poses: ऑफिसचं काम म्हटलं की तासन् तास एकाच ठिकाणी लॅपटॉपसमोर बसून काम करणं आलंच. खूप कमी लोक असे असतात जे या दरम्यान स्वतःसाठी थोडा सेल्फ केअर वेळ काढू शकतात. ऑफिसमध्ये तासन्तास लॅपटॉपसमोर बसून राहण्याचा परिणामही आपल्या शरीरावर स्पष्टपणे दिसून येतो. सतत बसल्याने वजन वाढणे, पोट सुटणे, कंबर आणि खांद्यात दुखणे आणि बरेच काही समस्या होतात. अशा वेळी अकाली म्हातारपण येऊ नये म्हणून शरीराला शारीरिक हालचालींचा काही डोस देत राहणे अत्यंत गरजेचे आहे. आज आम्ही तुम्हाला अशी काही योगासने सांगणार आहोत जे तुम्ही तुमच्या कामातून थोडा वेळ काढून सराव करू शकता. एकूणच आपले शरीर निरोगी ठेवण्यासाठी हे खूप उपयुक्त ठरतील. ही योगासनं तुम्ही अगदी १० मिनिटं सुद्धा करू शकता.
वज्रासन
आपल्या व्यस्त वेळापत्रकातून थोडा वेळ काढून तुम्ही वज्रासन करू शकता. हे आसन करण्यासाठी सर्वप्रथम गुडघे वाकवून पायावर बसावे. अशा प्रकारे बसताना लक्षात ठेवा की आपल्या दोन्ही पायांच्या अंगठ्यांमध्ये थोडे अंतर आहे आणि आपल्या कमरेवरील भाग एकदम सरळ आहे. आता आपले दोन्ही हात मांडीवर ठेवा आणि शरीराचे संपूर्ण वजन पायावर ठेवून मनाला आराम द्या. हे आसन नियमित केल्याने पोटाशी संबंधित समस्या दूर होतात, ज्यामुळे बसताना गॅस आणि पचनाच्या समस्या उद्भवत नाहीत.
ताडासन
या आसनाला माउंटन पोझ असेही म्हणतात. सतत एकाच स्थितीत काम केल्याने मणक्याची हाडे दुखू लागतात. अशावेळी मणक्याची हाडे मजबूत करण्यासाठी आणि पोटाची वाढलेली चरबी कमी करण्यासाठी ताडासन खूप फायदेशीर ठरू शकते. हे आसन करण्यासाठी सर्वप्रथम सावधान स्थितीत उभे रहा. यानंतर हात वरच्या बाजूला नेऊन दोन्ही हातांची बोटे एकत्र जोडावीत. आता पायाची टाच उंचावताना बोटांवर उभे राहा. थोडा वेळ या स्थितीत राहा आणि नंतर रिलॅक्स मोडवर परत या.
पद्मासन
सतत बसण्याचा सर्वाधिक परिणाम शरीराच्या पोश्चरवर होतो. बॉडी पोश्चर सुधारण्यासाठी आणि पाठदुखीपासून मुक्ती मिळवण्यासाठी पद्मासन करावे. हे आसन केल्याने एकाग्रताही वाढते आणि पोटही निरोगी राहते. ते करण्यासाठी आधी मांडी मारून बसा. आता आपला उजवा पाय डाव्या पायाच्या मांडीवर ठेवा आणि डावा पाय उजव्या पायाच्या मांडीवर ठेवा. आता आपल्या दोन्ही हातांचे तर्जनी बोट अंगठ्याच्या मधल्या रेषेवर ठेवा आणि हात गुडघ्यावर ठेवा. आता डोळे मिटून ५ ते १० मिनिटे पूर्णपणे शांत बसा.
दंडासन
हाडे आणि स्नायू बळकट करण्यासाठीही दंडासन खूप फायदेशीर आहे. हे आसन केल्याने मणक्याची हाडेही ताणली जातात आणि पचनसंस्था मजबूत होते. दंडासन करण्यासाठी सर्वप्रथम बसा आणि आपले दोन्ही पाय सरळ समोर पसरवा. आता आपले दोन्ही हात नितंब शेजारी जमिनीवर ठेवा. हे आसन करताना पाठ, डोके आणि मान सरळ ठेवा. यानंतर पायाची बोटे आपल्याकडे खेचून घ्या. हे आसन केल्याने तुमचे शरीर ताणले जाईल. ज्यामुळे हाडे आणि स्नायू मजबूत होतील.
(Disclaimer : या लेखात देण्यात आलेली माहिती ही सर्वसामान्य ज्ञानावर आधारित असून 'हिंदुस्तान टाइम्स मराठी' याची पुष्टी करत नाही. अवलंब करण्यापूर्वी तज्ज्ञांचा सल्ला घ्यावा.)
