मराठी बातम्या  /  लाइफस्टाइल  /  Hacks for Cooler: कुलर वापरताना काय काळजी घ्याल? जाणून घ्या सोप्या टिप्स!

Hacks for Cooler: कुलर वापरताना काय काळजी घ्याल? जाणून घ्या सोप्या टिप्स!

Tejashree Tanaji Gaikwad HT Marathi
Apr 02, 2024 03:32 PM IST

Tips to keep in mind while using cooler: उन्हाळ्याला सुरुवात झाली आहे. ज्यांच्याकडे एसी लावणे शक्य नसते त्या घरांमध्ये आवर्जून कुलर वापरतात. याचमुळे कुलर लावताना कोणत्या गोष्टी लक्षात ठेवल्या पाहिजेत हे जाणून घ्या.

how to use cooler
how to use cooler (freepik)

Summer Care Tips:उन्हाळ्यात उष्णता टाळण्यासाठी आपण सर्वजण घरात कूलर लावतो. कूलर लावल्याने एसीच्या तुलनेत बिल कमी येते आणि घरही थंडावते. तुम्हीही लवकरच कूलर बसवण्याचा विचार करत असाल तर काही गोष्टी लक्षात ठेवा. वास्तविक, अनेक कुलर लोखंडाचे बनलेले असतात ज्यांची वेळोवेळी दुरुस्ती करावी लागते. चला जाणून घेऊया कूलर वापरताना कोणत्या गोष्टी लक्षात ठेवल्या पाहिजेत.

या गोष्टी लक्षात घ्या

तापमान वाढल्याने कुलरचा वापर मोठ्या प्रमाणावर सुरू झाला आहे. मात्र खबरदारी न घेतल्याने अपघाताची शक्यता असते. त्यासाठी नागरिकांनी कुलर वापरताना विद्युत सुरक्षेची खबरदारी घ्यावी, असे आवाहन महावितरणने केले आहे. कुलरसाठी नेहमी थ्री-पिन प्लगचा वापर करावा. कुलरमध्ये पाणी भरण्यापूर्वी कुलरचा वीजपुरवठा बंद करून प्लग काढून ठेवावा म्हणजे कुलरचा विजेशी काहीही संबंध राहणार नाही. पाणी भरताना ते टाकीच्या खाली सांडून बाजूला जमिनीवर पसरणार नाही, याची खबरदारी घ्यावी. पाणी भरल्यानंतर प्लग पिन लावून स्विच चालू करावे. त्यानंतर कुलरच्या कुठल्याही भागाला स्पर्श करू नये. कुलरचे कनेक्शन व वायरिंग अधिकृत कारागिराकडून तपासून घ्यावे. अर्थिंगची तपासणी करून घ्यावी. अर्थिंग व्यवस्थित असल्यास लिकेज करंट येत नाही. कुलरच्या आतील वायर पाण्यामध्ये बुडणार नाही याची काळजी घ्यावी. पंपातून पाणी येत असल्यास वीजपुरवठा बंद करून नंतरच कुलरला हात लावावा. 

Summer Care Tips: या ५ मसाल्यांचे उन्हाळ्यात माफक प्रमाणात सेवन केले पाहिजे!

ओल्या हाताने कुलरला कधीही स्पर्श करू नये. लहान मुलांना नेहमी कुलरपासून सुरक्षित अंतरावर ठेवावे आणि ती कुलरजवळ खेळणार नाहीत, याबाबत दक्षता घ्यावी. कुलरच्या लोखंडी बाह्यभागात वीजप्रवाह उतरू नये यासाठी कुलरचा थेट जमिनीशी संपर्क येईल, अशी व्यवस्था करावी; जेणेकरून कुलरच्या लोखंडी बाह्यभागात वीजप्रवाह उतरल्यास त्याचा धक्का बसणार नाही. कुलरमधील पाण्याचा पंप ५ मिनिटे सुरू आणि १० मिनिटे बंद ठेवणाऱ्या इलेक्ट्रिक सर्किटचा वापर करावा. यामुळे विजेचीही मोठ्या प्रमाणावर बचत शक्य आहे. कुलरबाबत माहिती नसल्यास कनेक्शन बदल करू नये. कुलरची दुरुस्ती चालू अवस्थेत न करता प्लग काढून नंतरच काम करावे. कुलरच्या प्लगला जोडलेली वायर खंडित वा जीर्ण झालेली असल्यास बदलून दुसरी लावण्यात यावी. अनेकदा पाण्याची पातळी खोल गेल्याने पंप सुरू करूनही पाणी खेचले जात नाही व तो पंप एअर लॉक होतो. अशावेळी प्रायमिंग करणे आवश्यक असते. मात्र चालू पंपाचे प्रायमिंग करणे टाळावे. कुलर हलवताना प्लग पिन काढून नंतरच त्याची हालचाल करावी. कुलर पंप अधूनमधून बंद करावा. 

Summer Care: हे सुपरफूड्स उन्हाळ्यात शरीराला थंड ठेवण्यास करतील मदत! आहारात करा समावेश

घरामध्ये अर्थ लिकेज सर्किट ब्रेकर बसवून घ्यावे. आपल्या दैनंदिन व्यापातून थोडासा वेळ या उपाययोजनांसाठी दिला तर कुलरमुळे होणारे विद्युत अपघात टळू शकतात. त्यामुळे आजच या उपाययोजनांची अंमलबजावणी करण्याचे आवाहन महावितरणने केले आहे.

(Disclaimer : या लेखात देण्यात आलेली माहिती ही सर्वसामान्य ज्ञानावर आधारित असून ‘हिंदुस्तान टाइम्स मराठी’ याची पुष्टी करत नाही.)

WhatsApp channel

विभाग