मराठी बातम्या  /  लाइफस्टाइल  /  अचानक कमी होतेय वजन? लगेच करा या टेस्ट, असू शकतात 'ही' कारणं

अचानक कमी होतेय वजन? लगेच करा या टेस्ट, असू शकतात 'ही' कारणं

Hiral Shriram Gawande HT Marathi
Feb 15, 2023 11:30 AM IST

Health Tips: व्यायाम किंवा जॉगिंग न करता तुमचे वजन कमी होत असेल तर डॉक्टरांकडे जाऊन शरीराची तपासणी करून घेणे आवश्यक आहे. अनेक रोगांच्या सुरुवातीच्या लक्षणांमध्ये वजन कमी होणे देखील समाविष्ट आहे.

अचानक वजन कमी होण्याची कारणं
अचानक वजन कमी होण्याची कारणं

Sudden Weight Loss: शरीराच्या वाढत्या वजनामुळे बहुतेक लोक त्रस्त असतात. वजन कमी करण्यासाठी, जिममध्ये जाणे, घरी व्यायाम करणे किंवा जॉगिंग करणे अशा विविध पद्धतींना अवलंब लोक करत असतात. मात्र, तरीही अपेक्षित आकडा मिळणे कठीण दिसते. अशा परिस्थितीत अचानक तुमचे वजन कमी होत असेल किंवा कमी होत असेल तर आनंदी होण्यापूर्वी अशा चाचण्या करून घ्या. कारण अचानक वजन कमी होणे हे आरोग्यासाठी चांगले लक्षण नाही. अनेक आजारांची सुरुवात वजन कमी होण्यापासून होते. डॉक्टरांना भेटून आवश्यक चाचण्या करून घेतल्यास वेळेवर उपचार शक्य आहेत.

मधुमेह

संशोधनात असे दिसून आले आहे की वजन कमी होणे हे मधुमेहाच्या सुरुवातीचे सर्वात सामान्य लक्षण आहे. विशेषत: टाइप २ मधुमेह, जो जीवनशैलीत गडबड झाल्यामुळे होतो, त्यामुळे वजन झपाट्याने कमी होते. यामध्ये हात-पायांमध्ये मुंग्या येणे, अशक्तपणा आणि वजन कमी होणे ही लक्षणे दिसतात. वेळेवर मधुमेह ओळखून आहार आणि जीवनशैलीत बदल केला तर वजन सामान्य होते.

हायपरथायरॉईड

थायरॉईडचे दोन प्रकार आहेत. हायपोथायरॉईडमध्ये जिथे वजन वेगाने वाढू लागते तर दुसरीकेड हायपरथायरॉईडमध्ये वजन वेगाने कमी होऊ लागते. हे अतिक्रियाशील थायरॉईड हार्मोन्समुळे होते.

नैराश्य, तणाव

नैराश्य किंवा जास्त ताणतणाव असलेले लोक जेवणात कमी रस घेऊ लागतात. त्यामुळे त्यांचे वजन कमी होऊ लागते. डिप्रेशनमध्ये असताना बहुतेक लोक खाणे बंद करतात. त्यामुळे शरीरात साठलेल्या चरबीतून ऊर्जा शोषून घेण्यास सुरुवात होते आणि व्यक्तीचे वजन कमी होऊ लागते.

कर्करोग

वजन कमी होण्यामागे कॅन्सर देखील कारण असू शकतो. कोलन कॅन्सर, ओव्हेरियन कॅन्सर, ल्युकेमिया या कर्करोगात रुग्णाचे वजन झपाट्याने कमी होऊ लागते. कॅन्सरमध्ये शरीराची प्रतिकारशक्ती कमी होऊन शरीर कमकुवत होते.

पौष्टिक कमतरता

शरीराचे वजन अचानक कमी होण्याचे कारण काही वेळा पोषक तत्वे योग्य प्रकारे न घेणे हे असते. तसेच किडनी किंवा हृदय समस्यामुळे सुद्धा होते. पोटाच्या आजारामुळे किंवा संसर्गामुळे वजनही कमी होऊ लागते. त्यामुळेच व्यायाम न करता तुमचे वजन अचानक कमी झाले असेल तर नक्कीच डॉक्टरांकडून तपासणी करून घ्या.

(Disclaimer : या लेखात देण्यात आलेली माहिती ही सर्वसामान्य ज्ञानावर आधारित असून 'हिंदुस्तान टाइम्स मराठी याची पुष्टी करत नाही. अवलंब करण्यापूर्वी तज्ज्ञांचा सल्ला घ्यावा.)

विभाग