Mahatma Gandhi Jayanti: गांधी जयंतीला द्या दमदार भाषण, हे मुद्दे ठरतील उपयोगी
Gandhi Jayanti Speech: महात्मा गांधींनी देशाला स्वतंत्र करण्यासाठी खूप संघर्ष केला. त्यांच्या बलिदान आणि योगदानासाठी त्यांना 'राष्ट्रपिता' हा दर्जा देण्यात आला आहे.
Mahatma Gandhi Speech: आपण सर्वजण २ ऑक्टोबरला गांधी जयंती साजरी करतो. या दिवशी भारताचे महान स्वातंत्र्यसेनानी आणि नेते महात्मा गांधी यांचा जन्म झाला. हा दिवस राष्ट्रीय सण आहे. महात्मा गांधींनी देशाला स्वतंत्र करण्यासाठी खूप संघर्ष केला. त्यांच्या बलिदान आणि योगदानासाठी त्यांना 'राष्ट्रपिता' हा दर्जा देण्यात आला आहे. त्यांचा जन्म २ ऑक्टोबर १८६९ रोजी गुजरातमधील पोरबंदर येथे झाला. त्यांचे पूर्ण नाव मोहनदास करमचंद गांधी होते. पण लोक त्यांना प्रेमाने बापू म्हणत. गांधी जयंतीच्या दिवशी देशभरात राष्ट्रीय सुट्टी असते. २ ऑक्टोबर गांधी जयंतीनिमित्त तुम्ही भाषण करण्यासाठी आतुर असाल तर ही माहिती तुम्हाला उपयुक्त ठरू शकते.
आज २ ऑक्टोबर रोजी आपण महान स्वातंत्र्यसेनानी महात्मा गांधी यांची जयंती साजरी करत आहोत. ते १९व्या शतकातील सर्वात प्रतिष्ठित नेत्यांपैकी एक होते. गांधी जयंतीच्या निमित्ताने आपण सर्वजण इथे जमलो आहोत. मीही गांधीजींना आदरांजली अर्पण करतो. आज संपूर्ण देश त्यांचे स्मरण करत आहे. जगातील महान शास्त्रज्ञ अल्बर्ट आइनस्टाईन यांनी एकदा गांधीजींबद्दल म्हटले होते की, 'भावी पिढ्यांना विश्वास ठेवणे कठीण जाईल की मांस आणि रक्ताने बनलेली अशी व्यक्ती या पृथ्वीवर कधी आली.'
राष्ट्रपिता महात्मा गांधी यांचा जन्म २ ऑक्टोबर १८६९ रोजी गुजरातमधील पोरबंदर येथे झाला. लोकही त्यांना आदराने बापू म्हणत. हा दिवस भारत सरकारने राष्ट्रीय सण म्हणून घोषित केला आहे. सत्य आणि अहिंसा ही महात्मा गांधींची ताकद होती. त्यांनी नेहमीच सत्य आणि अहिंसेच्या मार्गावर चालण्याची शिकवण आपल्याला दिली.
महात्मा गांधींनी हाच मार्ग अवलंबून इंग्रजांचा सामना करून देश स्वतंत्र केला. गांधीजी अनेक चळवळींचे नेतेही झाले. असहकार आंदोलन, सत्याग्रह, दांडी यात्रा आणि भारत छोडो आंदोलन, गांधीजींच्या या सर्व आंदोलनांनी भारतातील ब्रिटिश राजवटीचा पाया हादरला. गांधीजी समाजात पसरलेल्या वाईट गोष्टींच्या विरोधात होते. ते दारू, जातिवाद, विषमता, अस्पृश्यता आणि स्त्रियांवरील अत्याचारांच्या विरोधात होते. दलितांची स्थिती सुधारण्यासाठी त्यांनी खूप कार्य केले. वाईट प्रथांविरुद्ध त्यांनी आवाज उठवला.
गांधीजींमध्ये लोकांचे नेतृत्व करण्याची अप्रतिम क्षमता होती. त्यांचे विचार दोन पिढ्यांना प्रेरणा देणारे होते. लोक त्यांच्या विचारांच्या प्रभावाखाली आले आणि स्वातंत्र्यलढ्याचा भाग बनले. स्वातंत्र्य चळवळीला नवी दिशा देण्याचे कामही त्यांनी केले. गांधीजींच्या अहिंसेच्या तत्त्वापुढे सारे जग झुकले. त्यामुळे आज २ ऑक्टोबर हा दिवस जगभरात आंतरराष्ट्रीय अहिंसा दिन म्हणून साजरा केला जातो. महान स्वातंत्र्यसेनानी आणि नेते महात्मा गांधी यांच्या विचार आणि कार्यामुळे २ ऑक्टोबर हा स्वातंत्र्यदिन आणि प्रजासत्ताक दिनासारखा राष्ट्रीय सण म्हणून साजरा केला जातो.
गांधी जयंतीला संपूर्ण भारतात कार्यक्रम आयोजित केले जातात आणि सर्वात महत्वाचा कार्यक्रम दिल्लीतील राजघाटावर आयोजित केला जातो. राष्ट्रपती, उपराष्ट्रपती, पंतप्रधान आणि इतर नेते महात्मा गांधींना राजघाटावर, त्यांच्या समाधीला आदरांजली वाहतात. बापूंचे विचार भारतालाच नव्हे तर संपूर्ण जगाला नेहमीच मार्गदर्शन करत राहतील. गांधीजींनी दाखवलेल्या मार्गावर चालत राहिले पाहिजे. स्वतःमध्ये आणि समाजात बदल घडवून आणूनच शांततापूर्ण आणि न्याय्य समाजाची निर्मिती होऊ शकते. गांधीजींचे संदेश समजून घेऊन ते अंमलात आणले पाहिजेत. त्यांचे शब्द आजही प्रासंगिक आहेत आणि कदाचित नेहमीच असतील. चला, गांधीजींनी दाखवलेल्या मार्गावर चालण्याचा संकल्प करूया!
