Ayurvedic Skin Care: त्वचेला नॅचरल ग्लो देतात या आयुर्वेदिक गोष्टी, चमक वाढवण्यासाठी असे वापरा
Beauty Tips: तुमच्या त्वचेवर चमक आणण्यासाठी रासायनिक प्रोडक्टऐवजी घरगुती उपाय चांगले असतात. तुमच्या ब्युटी केअरसाठी आयुर्वेदिक उपाय उत्तम आणि फायदेशीर असतात. ग्लोइंग स्किन मिळवण्यासाठी काय करावे पाहा.
Ayurvedic Tips for Glowing Skin: प्रत्येक व्यक्तीला सुंदर चमकदार त्वचा हवी असते. मात्र बदलत्या हवामानाचा परिणाम चेहऱ्यावर स्पष्टपणे दिसून येतो. त्यामुळे त्वचा कोरडी आणि निर्जीव दिसू लागते. अनेक लोक त्यांच्या त्वचेची चमक परत मिळविण्यासाठी विविध घरगुती उपाय देखील वापरतात. परंतु जेव्हा विषय ब्युटी केअरचा येतो तेव्हा आयुर्वेदिक उपाय सर्वोत्तम आणि फायदेशीर मानले जातात. आयुर्वेदिक उपाय कोणत्याही दुष्परिणामांशिवाय त्वचेचे पोषण करून चमकदार त्वचा राखण्यात मदत करतात. डॉ. दीक्षा यांनी अशाच आयुर्वेदित उपायांबद्दल सांगितले आहे, ज्यांच्या मदतीने आपण आपल्या चेहऱ्याचा हरवलेला रंग आणि चमक परत मिळवू शकतो. जाणून घ्या हे आयुर्वेदिक उपाय.
कांचन सुवर्णप्राशन
आपल्या दिवसाची सुरुवात स्वर्ण भस्म, तूप आणि मध यांचे २-३ थेंब मिसळून (कांचन सुवर्णप्राशन) सेवन करून करा. स्वर्ण भस्म त्वचेचा लालसरपणा आणि मुरुमांची जळजळ आणि हायपरपिग्मेंटेशन कमी करते. त्यात वापरलेले तूप त्वचेची लवचिकता (व्हिटॅमिन ए, डी, ई आणि के यांच्या उपस्थितीमुळे) आणि अँटी-ऑक्सिडंट्स राखण्यास मदत करते. तर मध नैसर्गिक ओलावा प्रदान करून अकाली वृद्धत्वाचे परिणाम दूर ठेवण्यास मदत करते.
डाळिंब खा
औषधी म्हणून आठवड्यातून तीन वेळा डाळिंबाचे सेवन करा. दाडिमाडी घृत हे डाळिंब, गाईचे तूप आणि इतर आयुर्वेदिक औषधी वनस्पतींपासून बनवलेल्या सर्वोत्कृष्ट आयुर्वेदिक फॉर्म्युलेशनपैकी एक आहे. हे तुमचा एचबी सुधारण्यास, पचन सुधारण्यास, रक्त शुद्ध करण्यासोबतच तुम्हाला शांत आणि स्थिर राहण्यास मदत करते. हे तुम्ही सकाळी किंवा झोपेच्या वेळी अर्धा चमचा कोमट दुधासह करू शकता.
आम्रपाली चहा
तुमच्या त्वचेचा रंग सुधारण्यासाठी रोज आम्रपाली चहा प्या. हा चहा रंग वाढवणाऱ्या औषधी वनस्पतींपासून बनवला जातो. यामुळे रक्त शुद्ध होते आणि त्वचेच्या असमान टोनची समस्या देखील दूर होते. त्यामुळे त्वचा चमकदार दिसते. हे करण्यासाठी ३ ग्रॅम आम्रपाली ३०० मिली पाण्यात ७ मिनिटे उकळा. यानंतर हे पाणी गाळून रिकाम्या पोटी चहाप्रमाणे प्या.
सुंदरी फेस मास्क
त्वचेची चमक वाढवण्यासाठी आठवड्यातून दोनदा सुंदरी फेस मास्क लावा. हा फेस मास्क जास्वंद, लोधरा, मंजिष्ठ, चंदन, गुलाब, हळद, लाल मसूर, केशर यांसारख्या औषधी वनस्पतींच्या मदतीने बनविला जातो. या औषधी वनस्पती रक्ताभिसरण सुधारतात आणि त्वचेला चमक देतात. ते वापरण्यासाठी सर्वप्रथम १ टेबलस्पून मास्क घेऊन त्यात गुलाबजल किंवा दूध किंवा साधे पाणी घालून पेस्ट तयार करा. आता ही पेस्ट तुमच्या त्वचेवर ३० मिनिटे लावा आणि नंतर कोमट पाण्याने धुवा.
मधुबाला
केशर सिरम मधुबालाला तुमच्या नाइट रुटीनचा भाग बनवा. हे केशर, उशिरा, चंदन, कमळ इत्यादी औषधी वनस्पतींनी बनलेले आहे, जे त्वचेचा रंग सुधारतात. ते वापरण्यासाठी आपल्या तळहातावर मधुबालाचे २-३ थेंब टाका, ते बोटांनी चेहऱ्यावर लावा आणि त्वचेवर हलक्या हाताने मसाज करा जोपर्यंत ते पूर्णपणे शोषले जात नाही. रात्रभर चेहऱ्यावर राहू द्या. त्यानंतर ताज्या आणि चमकदार त्वचेसाठी सकाळी चेहरा धुवा.
टीप - १२ आठवडे सतत तुमच्या दैनंदिन दिनचर्येत या ५ गोष्टींचा समावेश केल्यास तुम्हाला चांगले परिणाम मिळू शकतात.
(Disclaimer : या लेखात देण्यात आलेली माहिती ही सर्वसामान्य ज्ञानावर आधारित असून 'हिंदुस्तान टाइम्स मराठी' याची पुष्टी करत नाही. अवलंब करण्यापूर्वी तज्ज्ञांचा सल्ला घ्यावा.)
संबंधित बातम्या