विठुरायाच्या पंढरपुर नगरीत प्रेमाचं वेड लागणार! पाहा कोण कोण झळकणार ‘येड लागलं प्रेमाचं’ या नव्या मालिकेत
मराठी बातम्या  /  मनोरंजन  /  विठुरायाच्या पंढरपुर नगरीत प्रेमाचं वेड लागणार! पाहा कोण कोण झळकणार ‘येड लागलं प्रेमाचं’ या नव्या मालिकेत

विठुरायाच्या पंढरपुर नगरीत प्रेमाचं वेड लागणार! पाहा कोण कोण झळकणार ‘येड लागलं प्रेमाचं’ या नव्या मालिकेत

May 30, 2024 08:59 AM IST

‘येड लागलं प्रेमाचं’ ही मालिका देखील प्रेमातल्या वेडपणाची साक्ष देणारी असणार आहे. महाराष्ट्राचं कुलदैवत अशी ओळख असणाऱ्या विठुरायाच्या पंढरपुर नगरीत या मालिकेची गोष्ट घडणार आहे.

कोण कोण झळकणार ‘येड लागलं प्रेमाचं’ या नव्या मालिकेत
कोण कोण झळकणार ‘येड लागलं प्रेमाचं’ या नव्या मालिकेत

छोट्या पडद्यावर सध्या अनेक मराठी मालिका नव्याने दाखल होत आहे. यातच आता आणखी एका मालिकेची भर पडणार आहे. ‘येड लागलं प्रेमाचं’ असं या मालिकेचं नाव असून, यात अनेक गाजलेले टीव्हीवरचे चेहरे दिसणार आहेत. सध्या या मालिकेची जोरदार चर्चा सुरू आहे. या मालिकेत छोट्या पडद्यावर गाजलेले ३ चेहरे मुख्य भूमिकेत दिसणार आहेत. नुकताच गाजावाजा आणि ढोलताशांच्या गजरात या मालिकेचा प्रीमिअर सोहळा पार पडला. या खास सोहळ्याला मालिकेतील कलाकार मंडळींनी हजेरी लावली होती. चला तर बघूया या मालिकेत कोण कुठल्या भूमिकेत झळकणार आहे.

काय आहे मालिकेच्या कथानकाचा गाभा?

स्टार प्रवाह या मराठी वाहिनीवर नव्याने सुरू होणाऱ्या ‘येड लागलं प्रेमाचं’ या मालिकेत एक हटके प्रेमकथा दाखवण्यात येणार आहे. प्रेम हे माणसाला अंतर्बाह्य बदलून टाकतं. प्रेमात समोरच्याला बदलण्याचा अट्टहास नसतो, जे जसं आहे ते अगदी तसं त्याच्या पूर्ण गुण-दोषांसकट व्यक्ती त्याला स्वीकारतो आणि यालाच प्रेम म्हणतात. ‘येड लागलं प्रेमाचं’ ही मालिका देखील प्रेमातल्या वेडपणाची साक्ष देणारी असणार आहे. महाराष्ट्राचं कुलदैवत अशी ओळख असणाऱ्या विठुरायाच्या पंढरपुर नगरीत या मालिकेची गोष्ट घडणार आहे. राया आणि मंजिरी ही या मालिकेतली प्रमुख पात्र आहेत. एकमेकांचा तिरस्कार करणाऱ्या राया आणि मंजिरीचा एकमेकांच्या प्रेमात पडण्यापर्यंतचा प्रवास म्हणजे ‘येड लागलं प्रेमाचं’ ही मालिका आहे. ‘दख्खनचा राजा ज्योतिबा’ या मालिकेतून घराघरात पोहोचलेला अभिनेता विशाल निकम ‘राया’, ‘स्वाभिमान’ मालिकेतील प्रेक्षकांची लाडकी अभिनेत्री पुजा बिरारी ‘मंजिरी, लोकप्रिय अभिनेता ‘जय दुधाणे’ या मालिकेत ‘जय’ साकारताना दिसतील.

चव्हाट्यावर आला होता कृष्णा अभिषेक आणि गोविंदा यांचा वाद! मामा-भाच्यामध्ये नेमकं काय झालं होतं?

माझं आणि विठुरायाचं खास नातं!

‘राया’ या पात्राविषयी सांगताना अभिनेता विशाल निकम म्हणाला, ‘या कुटुंबात पुन्हा एकदा सामील होतोय याचा मला खूप आनंद आहे. ‘राया’ हे पात्र मी आतापर्यंत साकारलेल्या भूमिकांपेक्षा वेगळं आणि हटके आहे. खऱ्या आयुष्यातही माझं आणि विठुरायाचं खास नातं आहे. माऊलींच्या आशीर्वादामुळेच मी हा प्रवास करू शकलो आहे. माझ्या घरी वारकरी संप्रदायाची परंपरा आहे. या मालिकेची गोष्टसुद्धा पंढरपुरात घडते. त्यामुळे मी स्वत:ला खूप भाग्यवान समजतो.’

पहिल्यांदा पोलिस इन्सपेक्टरची भूमिका साकारतोय!

‘बिग बॉस मराठी’मधून घराघरांत पोहोचलेला अभिनेता जय दुधाणे या मालिकेच्या निमित्ताने पहिल्यांदाच पोलिसाची व्यक्तिरेखा साकारणार आहे. या अनुभवाविषयी सांगताना तो म्हणाला, ‘मी पहिल्यांदा पोलिस इन्सपेक्टरची भूमिका साकारतोय. आव्हान खूप मोठं आहे. व्यायाम करणं हे माझं पॅशन आहे. या भूमिकेसाठी मी फिटनेसवर जास्त मेहतन घेतोय. विशालसोबत याआधी काम केल्यामुळे आमची ओळख होतीच. पूजासोबत पण छान मैत्री जमली आहे. आम्हा तिघांचे सीन्स खूप छान होत आहेत.’

कॉमेडीच नाही तर व्हिलन म्हणूनही मोठ्या पडद्यावर गाजले परेश रावल! अभिनेत्याबद्दल ‘या’ गोष्टी वाचाच

पहिल्यांदा बैलगाडी चालवली!

अभिनेत्री पुजा बिरारीने शूटिंगच्या निमित्ताने पहिल्यांदा बैलगाडी चालवली आहे. या अनुभवविषयी सांगताना ती म्हणाली की, 'बैलगाडा शर्यत शूट करायची असं ठरल्यापासून मनात खूप उत्सुकता होती. मी कधीच बैलगाडी चालवली नव्हती. त्यामुळे प्रत्यक्ष अनुभव घेण्याची खुपच उत्सुकता होती. पंढरपुरात आम्ही ही बैलगाडा शर्यत शूट केली. जवळपास ४ ते ६ दिवस या खास भागाचं शूट सुरु होतं. बैलगाडी नुसती चालवायची नव्हती, तर ती शर्यतीत पळवायची होती. त्यामुळे खूप काळजी घेऊन शूट करावं लागत होतं. मी हा सीन बॉडी डबलची मदत न घेता केला. माझ्यासाठी हा अतिशय विलक्षण आणि अविस्मरणीय अनुभव होता.’

विशाल निकम, जय दुधाणे आणि पूजा बिरारीसोबतच मालिकेत नीना कुलकर्णी, अतिशा नाईक, उमेश नाईक, अभय राणे अशी दिग्गज कलाकार मंडळी या मालिकेत झळकणार आहेत.

Whats_app_banner