'झिरो'च्या अपयशानंतर चार वर्षे काम का केले नाही? शाहरुख खानने अभिनयाच्या ब्रेकवर सोडले मौन

शाहरुखने ब्रेक का घेतला?

शाहरुखने नुकताच एका वृत्तवाहिनीला मुलाखत दिली. या मुलाखतीमध्ये शाहरुख खानने ब्रेक घेण्याच्या निर्णयाचा चित्रपटाच्या अपयशाशी काहीही संबंध नसल्याचे सांगितले. 'व्यावसायिक सिनेमाच्या निकषांवर तो जास्तीत जास्त वैविध्यपूर्ण करण्याचा माझा प्रयत्न असतो. त्याच्यासोबत, ती गाणी, नृत्य, भांडणे आणि भावना असायला हव्यात. पण तरीही आपण नवीन काही सांगू शकतो का असा माझा प्रयत्न असतो? त्यामुळे मी जे काही सिनेमे करतो, मग तो जब हॅरी मेट सेजल असो किंवा झिरो किंवा फॅन असो, जे बॉक्स ऑफिसवर चांगली कामगिरी करू शकले नाहीत त्यांचा देखील समावेश आहे. मला हे चित्रपट मनोरंजक वाटले होते तसे मला ते खूप आवडले होते' असे शाहरुख म्हणाला.

ब्रेकबद्दल बोलताना शाहरुख खान म्हणाला की, 'हे झिरोच्या अपयशामुळे झालेले नाही. मी नेहमी म्हणतो की, ज्या दिवशी मला सकाळी उठून शूटिंग करावेसे वाटत नाही, त्या दिवशी मी काम करत नाही. चित्रपटाच्या अपयशामुळे नाही, खरं सांगायचं तर मी जानेवारीत चित्रपट करणार होतो आणि तो डिसेंबरमध्ये होता. माझ्याकडून हे खूप अनप्रोफेशनल झाले. मी एक दिवस उठलो आणि म्हणालो की मला या चित्रपटाच्या चित्रीकरणाला जायचे नाही.'
वाचा: शाहरुख, आमीर आणि सलमान खानच्या चित्रपटाचे दिग्दर्शन करण्याची कंगनाची इच्छा, म्हणाली 'दाखवून देईन...'

एक वर्षासाठी घेतला ब्रेक

शाहरुखने पुढे सांगितले की, त्याने एक वर्षासाठी ब्रेक घेण्याचा निर्णय घेतला. शाहरुखने चित्रपटाच्या निर्मात्याला सांगितले की, तो आपला चित्रपट करू शकणार नाही. कारण त्याला वर्षभर काम करायचे नव्हते. यावर निर्मात्याने सांगितले होते की, तुम्ही एक वर्षाचा ब्रेक घेत आहात हे शक्य नाही, तुम्ही एक मिनिटही रिकामे बसत नाही, त्यामुळे तुम्हाला चित्रपट आवडला नसेल तर नकार द्या, पण तुम्ही ब्रेक घेत आहात असे म्हणू नका. दीड वर्षांनंतर त्याच निर्मात्याने पुन्हा शाहरुख खानला फोन केला आणि सांगितले की, तू खरंच काम करत नाहीस याचे मला खूप आश्चर्य वाटत आहे.