Chhaava Teaser: विकी कौशलच्या ‘छावा’चा टीझर पाहून कतरिना कैफलाही भरली धडकी! नवऱ्याचं कौतुक करत म्हणाली...

कतरिना कैफने तिच्या इन्स्टास्टोरीवर ‘छावा’ या चित्रपटाचा ट्रेलर शेअर केला आहे. या टीझरसोबत तिने ‘रॉ, ब्रूटल, ग्लोरियस’ असे म्हणत या चित्रपटाचे कौतुक केले आहे. कतरिनाने तिच्या इन्स्टा स्टोरी पोस्टमध्ये पती विकी कौशल तसेच, ‘छावा’चे निर्माते मॅडॉक फिल्म्स, रश्मिका मंदाना, लक्ष्मण उतेकर आणि निर्माता दिनेश विजान यांनाही तिने टॅग करून, त्यांचेही कौतुक केले आहे. ‘छावा’ चित्रपटाचा टीझर पाहून कतरिना कैफ देखील भारावून गेली आहे.

कसा आहे चित्रपटाचा टीझर?

लक्ष्मण उतेकर दिग्दर्शित 'छावा' या चित्रपटात विकी कौशल छत्रपती संभाजी महाराजांची भूमिका साकारणार आहे. तर, अभिनेत्री रश्मिका मंदाना या चित्रपटात छत्रपती संभाजी महाराजांच्या पत्नी येसुबाई भोसले यांची भूमिका साकारणार आहे. आशुतोष राणा, दिव्या दत्ता आणि अक्षय खन्ना हे कलाकार देखील या चित्रपटात महत्त्वाच्या भूमिकेत दिसणार आहेत. या चित्रपटाच्या १ मिनिट १४ सेकंदाच्या टीझरची सुरुवात विकी कौशलच्या छत्रपती संभाजी महाराजांच्या भूमिकेने होते. टीझरच्या सुरुवातीला पार्श्वभूमीतून विकीचा आवाज येतो, ज्यामध्ये तो म्हणतो की, 'छत्रपती शिवाजी महाराजांना सिंह आणि सिंहाच्या मुलाला 'छावा' म्हणतात.’ यानंतर, शूर संभाजी महाराजांची कहाणी सुरू होते, जिथे सिंहासारखी गर्जना करणारा विकी एकाच वेळी समोरील सगळ्या शत्रूंवर हल्ला करतो.

विकी कौशलचा जबरदस्त लूक!

विकीचा कधीही न पाहिलेला अवतार एका छोट्याशा टीझरमध्ये पाहायला मिळाला आहे. महिनाभरापूर्वी ‘तोबा तोबा’वर कूल ड्यूडसारख्या नाचणाऱ्या विकीमध्ये ‘छावा’च्या निमित्ताने एवढे जबरदस्त परिवर्तन पाहायला मिळेल, यावर कोणाचाही विश्वास बसत नाहीये. त्याचा इंटेन्स लूक आणि ॲक्शन अवतार सगळ्यांनाच भुरळ घालत आहे. ‘छावा’ हा चित्रपट ६ डिसेंबर २०२४ रोजी प्रदर्शित होणार आहे. साऊथचा सुपरस्टार अल्लू अर्जुनचा मोस्ट अवेटेड चित्रपट ‘पुष्पा २: द रुल’ देखील याच दिवशी प्रदर्शित होणार आहे. या चित्रपटातही रश्मिका मंदाना मुख्य अभिनेत्री असणार आहे.