Third Eye Asian Film Festival: थर्ड आय आशियाई चित्रपट महोत्सवाची १० जानेवारी सुरुवात, ‘हे’ ८ चित्रपट दाखवले जाणार
Third Eye Asian Film Festival : ‘२१ वा थर्ड आय आशियाई चित्रपट महोत्सव’ यंदा १० जानेवारी ते १६ जानेवारी २०२५ या कालावधीत मुंबई आणि ठाणे येथे आयोजित केला जाणार आहे.
Third Eye Asian Film Festival: महाराष्ट्रातील चित्रपट संस्कृतीचा मानदंड असणारा ‘थर्ड आय आशियाई चित्रपट महोत्सव’ पुन्हा एकदा चित्रपट रसिकांच्या भेटीस येणार आहे. यंदा ‘थर्ड आय आशियाई चित्रपट महोत्सवा’चे हे २१वे वर्ष असून, १० जानेवारीपासून मुंबई आणि ठाणे येथे हा महोत्सव आयोजित केला जाणार आहे.
‘२१ वा थर्ड आय आशियाई चित्रपट महोत्सव’ यंदा १० जानेवारी ते १६ जानेवारी २०२५ या कालावधीत मुंबई आणि ठाणे येथे आयोजित केला जाणार आहे. महोत्सवात निवडलेले ६१ चित्रपट मुव्हीमॅक्स अंधेरी, सायन आणि ठाणे येथे दाखवले जातील. कान महोत्सवात अ-सर्टन रिगार्ड विभागात सर्वोत्तम ठरलेल्या ‘द ब्लॅक डॉग’ या चायनीज चित्रपटाच्या प्रदर्शनाने महोत्सवाचे उद्घाटन होणार आहे.
हॉलिवूड आणि युरोपमधील चित्रपट भारतीय प्रेक्षकांना पाहण्यासाठी सहज उपलब्ध होत आहेत. मात्र जागतिक स्तरावर गाजत असलेले आशियाई चित्रपट प्रेक्षकांपर्यंत पोहोचत नाहीत. विविध आंतरराष्ट्रीय चित्रपट महोत्सवांमध्ये लोकप्रिय असलेले हे चित्रपट मुंबई आणि महाराष्ट्रातील इतर शहरातील प्रेक्षकांना दाखविण्याच्या उद्देशाने एशियन फिल्म फाऊंडेशनने थर्ड आय एशियन फिल्म फेस्टिव्हलचे आयोजन सुरू केले आहे. पहिला महोत्सव ३ ऑगस्ट २००२ रोजी आयोजित करण्यात आला होता. गेल्या जवळपास २० वर्षांपासून हा चित्रपट महोत्सव मुंबईत आयोजित केला जात आहे.
थर्ड आय आशियाई चित्रपट महोत्सवाच्या २१ व्या आवृत्तीत आशियाई स्पेक्ट्रम विभागात चीन, भूतान, नेपाळ, बांगलादेश, मलेशिया, कझाकिस्तान, ट्युनिशिया, जपान, इराण, साउथ कोरिया आणि श्रीलंका या देशातील चित्रपटांचा समावेश आहे आणि साउथ कोरिया मधील सहा चित्रपट कंट्री फोकस विभागात दाखवले जातील.
आशियाई चित्रपटांबरोबरच भारतीय चित्रपट आणि मराठी चित्रपटांचा स्पर्धा विभाग हे महोत्सवाचे आकर्षण ठरणार आहे. भारतीय चित्रपट विभागात मल्याळम, कन्नड, तेलुगू, बंगाली, आसामी या भाषांमधील अकरा चित्रपटांचा समावेश आहे. त्यात नवीनचंद्र दिग्दर्शित ‘झंझारपुर’, प्रबल खुंद दिग्दर्शित ‘पाई तंग’, जदुमनी दत्ता दिग्दर्शित ‘जुईफुल’ या चित्रपटांचा समावेश आहे.
मराठी स्पर्धा विभागात आठ मराठी चित्रपट दाखवले जाणारे मराठी चित्रपट –
- आशा (दिग्दर्शक दीपक पाटील)
- सिनेमॅन (दिग्दर्शक उमेश बगाडे)
- कर्मयोगी आबासाहेब (दिग्दर्शक अल्ताफ शेख )
- जिप्सी (दिग्दर्शक शशी खंदारे),
- भेरा (दिग्दर्शक श्रीकांत भिडे),
- मॅजिक (दिग्दर्शक रवी करमरकर),
- मंडळ आभारी आहे (दिग्दर्शक विद्यासागर अध्यापक),
- छबिला (दिग्दर्शक अनिल भालेराव)
या महोत्सवात सुप्रसिद्ध पटकथा लेखक आणि गीतकार जावेद अख्तर यांना ‘आशियाई चित्रपट संस्कृती पुरस्कार’ देण्यात येणार असून आणि पत्रकार रफिक बगदादी यांना ‘सत्यजित राय मेमोरियल पुरस्कार’ देऊन सन्मानित केले जाणार आहे.
महोत्सवाची प्रतिनिधी नोंदणी www.thirdeyeasianfilmfestival.com या वेबसाइटवर सुरु झाली आहे. प्रतिनिधी शुल्क रु.१०००/- असून फिल्म सोसायटी आणि विद्यार्थ्यांसाठी हे शुल्क रु. ७५०/- असणार आहे.
संबंधित बातम्या