SRK Death threat: शाहरुख- आर्यनवर होते लक्ष, जीवे मारण्याची धमकी देणाऱ्याचा मोठा खुलासा
SRK Death threat: शाहरुख खानला जीवे मारण्याची धमकी देणारा मुख्य आरोपी मुलगा आर्यन खानच्या हालचालींवर लक्ष ठेवून होता, असे तपासात समोर आले आहे.
अभिनेता शाहरुख खानला जीवे मारण्याची धमकी दिल्याप्रकरणी अटक करण्यात आलेला आरोपी शाहरुख खानच्या हालचालींवर लक्ष ठेवून होता. त्याच्या कुटुंबाविषयी संवेदनशील माहिती मिळवण्याचा ही प्रयत्न करत होता, असा दावा एका नव्या अहवालात करण्यात आला आहे. रायपूरयेथील वकील फैजान खानला शाहरुखला जीवे मारण्याची धमकी देऊन खंडणी मागितल्याप्रकरणी अटक करण्यात आली आहे.
आरोपीने अभिनेत्याच्या हालचालींवर ठेवले होके लक्ष
टाइम्स ऑफ इंडियाच्या एका नवीन अहवालात म्हटले आहे की, तपासात असे आढळले आहे की फैजान शाहरुख खानच्या कुटुंबाची सुरक्षा आणि हालचालींबद्दल तपशील गोळा करण्यासाठी 'संपूर्ण ऑनलाइन शोध' घेत असे. अभिनेता आणि त्याचा मुलगा आर्यन खान यांच्या हालचालींवरही त्यांनी नजर ठेवली. वांद्रे पोलिसांच्या तपास पथकाने जप्त केलेल्या फैजानच्या दुसऱ्या मोबाइलफोनच्या फॉरेन्सिक विश्लेषणातून ही माहिती समोर आली आहे.
पुढील दहा दिवस न्यायालयीन कोठडीत असलेला फैजान अभिनेता आणि त्याच्या कुटुंबीयांच्या हालचालींचा शोध घेण्यामागील कारणांबद्दल तपासकर्त्यांना टाळाटाळ आणि परस्परविरोधी उत्तरे देत असल्याचे वृत्त आहे. शाहरुख आणि आर्यन या दोघांनाही महाराष्ट्र सरकारने वाय प्लस सुरक्षा दिली आहे.
काय आहे प्रकरण?
मुंबई पोलिसांना ७ नोव्हेंबर रोजी शाहरुख खानच्या जीवाला धोका असलेला निनावी फोन आला होता आणि ५० लाख रुपयांची खंडणी मागितली होती. पोलिसांनी हा कॉल रायपूरला ट्रेस केला असता तो फोन फैजान खानचा असल्याचे निष्पन्न झाले. सुरुवातीला फैजानने आपला फोन चोरीला गेल्याचा आणि त्याला फसवले जात असल्याचा दावा केला होता. मुंबई पोलिसांनी प्राथमिक तपासानंतर पेशाने वकील असलेल्या फैजान खानला अटक केली.
वाचा: ए. आर. रेहमान गिटारवादक मोहिनीला करतोय डेट? दोघांनीही एकाच वेळी घटस्फोटाची घोषणा केल्याने चर्चांना उधाण
फैजानला १२ नोव्हेंबर रोजी चौकशीसाठी आणले. खान यांना १८ नोव्हेंबरपर्यंत पोलिस कोठडी आणि त्यानंतर दोन आठवड्यांची न्यायालयीन कोठडी सुनावण्यात आली. फैजान खानने यापूर्वी मुंबई पोलिसांकडे शाहरुख खानविरोधात अंजाम (१९९४) या चित्रपटातील हरिणांच्या शिकारीविषयीच्या संवादाबद्दल तक्रार केली होती.
