Salman Khan News : सलमान खानला ५ कोटींसाठी धमकी देणारा निघाला भाजीवाला! पोलिसांनी केली अटक

जमशेदपूर येथून ताब्यात घेतलेल्या संशयिताची वरळी पोलिसांचे पथक चौकशी करत आहे. आरोपींना तपासासाठी मुंबईत आणण्यात येणार आहे. दरम्यान, एक पथक गुवाहाटीला पाठवण्यात आले आहे. गेल्या आठवड्यात मुंबई वाहतूक पोलिसांच्या व्हॉट्सअॅप हेल्पलाइनवर सलमान खानकडे पाच कोटी रुपयांची खंडणी मागणारा धमकीचा मेसेज आला होता.

झारखंडमधून झाली अटक

पोलिसांनी आंबा परिसरातून शेख हुसेन नावाच्या व्यक्तीला अटक केल्याचे सांगण्यात येत आहे. त्याचा मोबाईलही जप्त करण्यात आला आहे. याच व्यक्तीने मुंबई वाहतूक पोलिसांच्या व्हॉट्सॲप हेल्पलाइनवर धमकीचा संदेश पाठवला होता. गेल्याच आठवड्यात मुंबई वाहतूक पोलिसांच्या व्हॉट्सॲप हेल्पलाइनवर ५ कोटी रुपयांच्या खंडणीचा हा मेसेज आला होता. त्यानुसार पोलिसांनी गुन्हा दाखल करून तपास सुरू केला होता.

झारखंडच्या नंबरवरून हा मेसेज पाठवण्यात आला होता, त्यानंतर मुंबई पोलिसांनी गुन्हा दाखल केला होता. पोलिसांनी या धमकीचा तपास सुरू केला होता. तपासादरम्यान हा धमकीचा मेसेज झारखंडमधील एका नंबरवरून पाठवण्यात आल्याचे पोलिसांना आढळून आले. त्यानंतर आरोपींना पकडण्यासाठी पथके रवाना करण्यात आली.

Viral Video : ‘ज्याने काळवीट मारलं तो मी नव्हतो...’; बिश्नोई गँगच्या दहशतीदरम्यान सलमान खानचा व्हिडीओ व्हायरल!

काय होता मेसेज?

धमकी देणाऱ्या व्यक्तीने सलमान खानला इशारा दिला होता की, जर त्याने तुरुंगात असलेल्या गँगस्टर लॉरेन्स बिश्नोईला ५ कोटी रुपये देऊन, हा खटला सोडवला नाही तर त्याची अवस्था बाबा सिद्दीकीपेक्षाही वाईट होईल, असे म्हटले होते. अटक करण्यात आलेला व्यक्ती शेख हुसेन हा भाजीपाला विकतो, असे सांगण्यात येत आहे. त्याने टीव्हीवर गँगस्टर लॉरेन्स बिश्नोई आणि सलमान खानशी संबंधित बातम्या पाहिल्या होत्या. त्याआधारे त्याने हे पाऊल उचलले असल्याचे म्हटले जात आहे..

सलमान खानला लॉरेन्स बिश्नोई टोळीकडून यापूर्वी अनेकदा जीवे मारण्याची धमकी मिळाली आहे. या वर्षी एप्रिलमध्ये संशयित टोळीतील सदस्यांनी अभिनेत्याच्या वांद्रे येथील निवासस्थानाबाहेर गोळीबार केला होता. काही महिन्यांपूर्वी नवी मुंबई पोलिसांनी या प्रकरणाच्या तपासात लॉरेन्स बिश्नोई टोळीने सलमान खानच्या हत्येचा कट रचल्याचे म्हटले होते. यानंतर सलमान खानच्या सुरक्षेत वाढ करण्यात आली होती.