Saif Ali Khan : सैफ अली खानवर ६ वार, ३ तासांपासून अभिनेत्यावर शस्त्रक्रिया सुरू! करीनाची तब्येत कशी आहे?
Saif Ali Khan Injured : करीना कपूर खान आणि सैफ अली खान यांच्या घरात चोरी झाली आहे. या घटनेदरम्यान एका चोरट्याने सैफवर चाकूने ६ वार केले, ज्यामुळे अभिनेता जबर जखमी झाला आहे.
Saif Ali Khan Admitted In Hospital : बॉलिवूड अभिनेता सैफ अली खान आणि अभिनेत्री करिना कपूर यांच्या वांद्रे पश्चिम येथील घरात गुरुवारी मध्यरात्री अडीचच्या सुमारास जबरी चोरी झाली. चोरीदरम्यान सैफ अली खानवरही चाकूने हल्ला करण्यात आला होता. पोलिसांनी दिलेल्या माहितीनुसार, सैफ अली खानला लीलावती रुग्णालयात दाखल करण्यात आले असून, त्याच्यावर उपचार सुरू आहेत. चोरट्याशी झालेल्या झटापटीत त्याच्यावर आधी चाकूने वार करण्यात आले की, त्याला जखमी करण्यात आले, हे समजू शकलेले नाही. मुंबई पोलीस आणि गुन्हे शाखा या प्रकरणाचा तपास करत आहेत.
करीना कपूर कशी आहे?
वांद्रे पोलिसांनी एफआयआर दाखल करण्याची प्रक्रिया सुरू केली असून, आरोपींना पकडण्यासाठी अनेक पथके तयार करण्यात आली आहेत. या जबरी चोरी आणि झालेल्या हल्ल्यात करीना कपूर आणि तिची मुले सुखरूप आहेत. सध्या करीना पती सैफसोबत लीलावती हॉस्पिटलमध्ये आहे. कुटुंबीयांनी अद्याप या घटनेबाबत कोणतेही अधिकृत निवेदन दिलेले नाही. प्राथमिक तपासानंतर पोलीस लवकरच या प्रकरणाची सविस्तर माहिती देण्याची शक्यता आहे. सध्या घराच्या आजूबाजूचे सीसीटीव्ही फुटेज तपासले जात आहे.
मोठी बातमी! सैफ अली खानवर चाकू हल्ला, घरात शिरलेल्या चोराकडून सपासप वार, जखमी झाल्याने रुग्णालयात दाखल
सदर घटना घडली तेव्हा अभिनेता सैफ अली खान, पत्नी करीना आणि खान कुटुंबातील इतर सगळी मंडळी निद्रावस्थेत होती. पोलिसांनी दिलेल्या माहितीनुसार, या अज्ञात चोरट्याने घरात घुसून सैफ अली खानवर चाकूने ६ वेळा वार केले. या हल्ल्यानंतर कुटुंबाला जाग येताच चोरट्याने घटनास्थळावरून पळ काढला. पोलीस आता त्याचा शोध घेत आहेत.
३ तासांपासून सुरू आहे अभिनेत्यावर सर्जरी!
लीलावती रुग्णालयाचे सीओओ डॉ. नीरज उत्तमणी यांनी सांगितले की, सैफवर त्याच्या घरी अज्ञात व्यक्तीने हल्ला केला. या हल्ल्यात सैफ जखमी झाला होता. त्यामुळे पहाटे साडेतीन वाजता त्यांना लीलावती रुग्णालयात आणण्यात आले. त्याला सहा ठिकाणी जखमा झाल्या असून, त्यापैकी दोन ठिकाणी गंभीर जखमा झाल्या आहेत. त्याच्या मणक्याजवळ एक तर मानेवर एक जखम झाली आहे. न्यूरोसर्जन नितीन डांगे, कॉस्मेटिक सर्जन लीना जैन आणि भूलतज्ज्ञ निशा गांधी यांनी पहाटे साडेपाच वाजता शस्त्रक्रिया सुरू केली आणि अजूनही ते शस्त्रक्रियेत व्यस्त आहेत. शस्त्रक्रियेनंतरच सैफची प्रकृती कशी आहे हे कळेल.
संबंधित बातम्या