Marathi Natak : ‘अलबत्या गलबत्या’ नाटकाचा विश्वविक्रम! काय आहे विक्रम जाणून घ्या
Marathi Natak : ‘अलबत्या गलबत्या’ या नाटकाचे दिग्दर्शन अभिनेते चिन्मय मांडलेकर यांनी केले आहे. आता हे नाटक काय विश्वविक्रम करणार चला पाहूया...
प्रायोगिक, व्यावसायिक नाटयसृष्टीच्या युगात सध्याच्या घडीला लहान मुलांसाठी काही विशेष नाटकं रंगभूमीवर येताना दिसत आहेत. ही बालनाट्ये लहान मुलांसोबत थोरा मोठ्यांचेही चांगले मनोरंजन करताना दिसत आहेत. लहान मुलांना नाट्यगृहात घेऊन जाणारे पालक देखील या नाटकांचा आनंद घेताना दिसतात. या यादीमध्ये ‘अलबत्या गलबत्या’ या नाटकाचा देखील समावेश आहे. तुफान लोकप्रियता मिळवणारे 'अलबत्या गलबत्या' हे नाटक आता एका नव्या विश्वविक्रमासाठी सज्ज झाले आहे.
काय आहे विश्वविक्रम
‘अलबत्या गलबत्या’ या नाटकाची टीम येत्या स्वातंत्र्यदिनी १५ ऑगस्टला सलग ६ प्रयोग करणार आहेत. मराठी बालरंगभूमीच्या इतिहासात पहिल्यांदाच एखाद्या नाटकाचे सलग सहा प्रयोग होणार आहेत. त्यामुळे हे नाटक जागतिक विक्रम करण्यासाठी सज्ज झाले आहे. सकाळी ७.०० ते रात्री १०.३० यावेळेत हे ६ विश्वविक्रमी प्रयोग दादरच्या श्री शिवाजी मंदिर येथे रंगणार आहेत.
‘अलबत्या गलबत्या’ या नाटकाविषयी
शाळा सुटता, पुस्तक मिटता, करुया आपण गमत्या जमत्या.. अलबत्या गलबत्या..... अलबत्या गलबत्या....अलबत्या गलबत्या... अलबत्या. असं म्हणत चिंची चेटकिणीची धमाल प्रेक्षकांना हसवत हसवत थरार, उत्सुकता आणि विनोदाची तिहेरी मेजवानी देते. चेटकीण झालेले निलेश गोपनारायण यांच्याबरोबरच सनीभूषण मुणगेकर, श्रद्धा हांडे आदि दहा कलाकारांची फौज आपल्या अफलातून उत्साहाने प्रेक्षकांचे तुफान मनोरंजन करते.
अनेक विक्रमांना गवसणी घालत ‘अलबत्या गलबत्या’ बालनाट्याची घौडदौड सुरू आहे. कोविडचा काळ सोडला तर ६ वर्षात ८०० प्रयोगांचा टप्पा पार केला आहे आणि विक्रमी १००० व्या प्रयोगाकडे वाटचाल सुरू आहे. कलेप्रती असणारी बांधिलकी जपत कलाक्षेत्रासाठी वेगळं काहीतरी करू पाहणाऱ्या कलावंतांमध्ये निर्माते राहुल भंडारे यांचे नाव आवर्जून घ्यावे लागेल. ‘अलबत्या गलबत्या’ नाटकाच्या प्रयोगाच्या तिकीटांसाठी नाट्यरसिकांनी लावलेल्या रांगा या त्याच्या अभूतपूर्व यशाची कल्पना देतात.
या नाटकाने बालरंगभूमीवर अनेक यशस्वी प्रयोग केले आता सलग नाटय़ानुभवाचा ऐतिहासिक प्रयोग करत जागतिक विक्रमाच्या मानाचा तुरा ‘अलबत्या गलबत्या’नाटकाच्या शिरपेचात रोवला जाणार आहे. या सर्व नाट्यानुभवासाठी नाटकाच्या टीमने जय्यत तयारी सुरु केली आहे. कलाकार व संपूर्ण टीमचा डायटिशियनच्या सल्ल्याने आहार, डॉक्टरांची टीम, आरामाची व्यवस्था, सजावट ते इतर सगळी जय्यत तयारी या नाटकाच्या टीमने नव्या विश्वविक्रमासाठी केली आहे.
वाचा: 'बिग बॉस मराठी ५'च्या घरातील अंकिता वालावलकरचा बॉयफ्रेंडने केला होता छळ, वाचा खासगी आयुष्याविषयी
‘अलबत्या गलबत्या’ या नाटकाचे दिग्दर्शन चिन्मय मांडलेकर यांनी केले आहे. रत्नाकर मतकरी लिखित हे नाटक रंगभूमीवर आणण्याचं शिवधनुष्य निर्माते राहुल भंडारे यांनी उचलले आणि या बालनाट्यानं इतिहास घ़डवला. तुफान लोकप्रियता मिळवणारं 'अलबत्या गलबत्या' नाटक आता एका नव्या विश्वविक्रमासाठी सज्ज झालं आहे. मराठी रंगभूमीवर 'मैलाचा दगड' ठरलेल्या या नाट्यकृतीचा अशा प्रकारचा प्रयोग कलाकार, तंत्रज्ञ या सर्वांनाच एक मोठं आव्हान असलं तरी कलावंतांना हा नाट्यानुभव खूप काही शिकवणारा असेल असं मत निर्माते राहुल भंडारे यांनी व्यक्त केलं. हा भव्य नाट्यपट एकाच दिवशी, एकाच थिएटरमध्ये एकापाठोपाठ बघणं म्हणजे नाट्यरसिकांसाठी पर्वणीच आहे. या सलग नाट्यानुभवाच्या संकल्पनेला रसिकांनी उत्स्फूर्त प्रतिसाद दिला असून या नाटकाची जोरदार तिकीटविक्री सुरु झाली आहे.
संबंधित बातम्या