‘पृथ्वीराज’साठी अक्षय कुमारने घेतले तगडे मानधन, जाणून बसेल धक्का

बॉलिवूड अभिनेता अक्षय कुमारचा 'पृथ्वीराज' (prithviraj) हा चित्रपट गेल्या काही दिवसांपासून चर्चेत आहे. या चित्रपटाची चाहते आतुरतेने वाट पाहात आहेत. या चित्रपटात अक्षयसोबत मानुषी छिल्लर, सोनू सूद, संजय दत्त हे कलाकार मुख्य भूमिकेत दिसणार आहेत. नुकताच या चित्रपटाचा ट्रेलर प्रदर्शित झाला असून सोशल मीडियावर व्हायरल झाला होता. आता अक्षयने या चित्रपटासाठी किती रुपये मानधन म्हणून घेतले हे जाणून घेण्यासाठी सर्वजण उत्सुक आहेत.

समोर आलेल्या माहितीनुसार, अक्षय कुमारने (Akshay Kumar) चित्रपटासाठी जवळपास ६० कोटी रुपये मानधन म्हणून घेतले आहे. मानुषीने एक कोटी रुपये घेतल्याच्या चर्चा रंगल्या आहेत. तर संजय दत्तने पाच कोटी रुपये घेतल्याचे म्हटले जात आहे. सोनू सूदने तीन कोटी रुपये घेतल्याच्या चर्चा रंगल्या आहेत. एकंदरीत चित्रपटासाठी कलाकारांनी तगडे मानधन घेतल्याचे दिसत आहे.

‘पृथ्वीराज’ हा चित्रपट महान भारतीय सम्राट पृथ्वीराज चौहान यांच्या आयुष्यावर आधारित असून अक्षय या चित्रपटात पृथ्वीराज चौहान ही मध्यवर्ती भूमिका साकारत आहे. तर अभिनेत्री मानुषी छिल्लर या चित्रपटातून बॉलिवूडमध्ये पदार्पण करणार आहे. या चित्रपटात ती पृथ्वीराज चौहान यांच्या पत्नीची भूमिका साकारताना दिसणार आहे. यासोबतच चित्रपटात संजय दत्त, सोनू सूद आणि आशुतोष राणा प्रमुख भूमिकेत झळकणार आहेत. चंद्र प्रकाश द्विवेदी यांनी चित्रपटाचे दिग्दर्शन केले. हा चित्रपट ३ जून रोजी चित्रपटगृहांमध्ये प्रदर्शित होणार आहे. तसेच हिंदी, तमिळ आणि तेलुगू या भाषांमध्ये चित्रपट प्रदर्शित होणार आहे.