Paresh Rawal : अक्षय कुमारसोबत दिसले परेश रावल आणि सुनील शेट्टी! चाहत्यांनी विचारलं ‘हेरा फेरी ३’ सुरू झालं का?
Hera Pheri 3 Latest Update: नुकतेच अक्षय कुमार, सुनील शेट्टी आणि परेश रावल यांना एकत्र स्पॉट करण्यात आले. यामुळे आता चाहते अधिकच उत्सुक झाले आहेत.
Hera Pheri 3 Latest Update : हिंदी चित्रपटसृष्टीतील सर्वात आवडती आणि लोकप्रिय कॉमेडी फ्रँचायझी म्हणजे हेरा फेरी. या चित्रपटाने केवळ प्रेक्षकांना हसवलेच नाही, तर त्याच्या पात्रांनी एक वेगळीच ओळख निर्माण केली. ‘हेरा फेरी’ (२०००) आणि त्याचा सिक्वेल ‘हेरा फेरी २’ (२००६) या चित्रपटांना प्रचंड यश मिळाले. आता या लोकप्रिय फ्रँचायझीचा तिसरा भाग ‘हेरा फेरी ३’ येण्याची चर्चा जोरात सुरू आहे, आणि त्यावर येणाऱ्या नवीन बातम्या चाहत्यांच्या उत्कंठा अधिकच वाढवत आहेत.
‘हेरा फेरी’च्या पहिल्या दोन भागांमध्ये अक्षय कुमार, सुनील शेट्टी आणि परेश रावल यांची जादुई तिकडी दिसली होती, जिला प्रेक्षकांनी फारच पसंती दिली. राजू, श्याम आणि बाबू राव या त्यांच्या तिन्ही पात्रांच्या अभिनयाने चित्रपटाला वेगळेच रंग दिले होते. या तिघांच्या अदाकारीतून निर्माण झालेल्या हास्याने चित्रपटाला अमाप यश मिळवून दिले.
तिघे एकत्र येणार?
मात्र, ‘हेरा फेरी ३’च्या बाबतीत काही वेळा गैरसमज आणि अफवांचा बाजार भरला होता. काही काळ अक्षय कुमारने या फ्रँचायझीपासून वेगळे होण्याची घोषणा केली होती. यामुळे अनेक प्रेक्षक आणि चाहत्यांना धक्का बसला. परंतु नंतर सुनील शेट्टी आणि परेश रावल यांनी अक्षय कुमारच्या पुनरागमनावर प्रतिक्रिया दिली आणि या त्रिकूटाच्या एकत्र येण्याच्या बातम्या पुन्हा चर्चेत आल्या. आता एक अत्यंत महत्त्वाची गोष्ट समोर आली आहे, जी ‘हेरा फेरी ३’च्या प्रेक्षकांची उत्कंठा आणखी वाढवणार आहे.
अक्षय, सुनील आणि परेश यांनी गाजवला पडदा!
नुकतेच अक्षय कुमार, सुनील शेट्टी आणि परेश रावल यांना एकत्र स्पॉट करण्यात आले. सेलेब फोटोग्राफर पल्लव पालीवाल यांनी या तिन्ही कलाकारांचे नवीन फोटो शेअर केले आहेत, ज्यामुळे ‘हेरा फेरी ३’च्या चर्चा पुन्हा जोरात सुरू झाल्या आहेत. चित्रपटाच्या प्रेमी आता उत्सुकतेने ‘हेरा फेरी ३’च्या अधिकृत घोषणेची वाट पाहत आहेत. ‘हेरा फेरी’च्या पहिल्या दोन भागांत या तिघांचा आपला वेगळा ठसा उमटवला होता. त्यांच्या केमिस्ट्री आणि संवादांनी चित्रपटाला एक कालातीत दर्जा दिला. परंतु, हेरा फेरीच्या फ्रँचायझीच्या या तिसऱ्या भागातील कथा आणि त्यातील कॉमेडी तसंच पात्रांच्या जोडीवर अजूनही गोंधळ सुरू आहे.
‘या’ चित्रपट दिसणार एकत्र
यापूर्वीही, अक्षय कुमार, सुनील शेट्टी आणि परेश रावल हे तिघे अनेक कॉमेडी चित्रपटांमध्ये एकत्र दिसले आहेत. ‘दे दना दन’, ‘आवारा पागल दीवाना’ आणि ‘दिवाने हुए पागल’ यांसारख्या चित्रपटांमध्ये त्यांच्या एकत्र येऊन केलेल्या अभिनयाने प्रेक्षकांचा दिलखुलास हसवले आहे. या तिघांच्या मजेदार तिकडीचा एक स्वतःचा चाहता वर्ग आहे. येत्या काळात या तिघांचा आणखी एक चित्रपट प्रेक्षकांना पाहायला मिळणार आहे. अहमद खानच्या आगामी चित्रपट ‘वेलकम टू द जंगल’मध्ये हे तिघे एकत्र दिसणार आहेत.
