अनेक महोत्सव गाजवलेला सिनेमा ‘हजारवेळा शोले पाहिलेला माणूस’ अखेर ‘या’ दिवशी होणार प्रदर्शित

काय आहे 'हजारवेळा शोले पाहिलेला माणूस' चित्रपट?

'हजारवेळा शोले पाहिलेला माणूस' या चित्रपटाच्या नावातूनच "शोले" या गाजलेल्या चित्रपटाशी कथेचा काहीतरी संबंध आहे हे स्पष्ट होते. चित्रपटाच्या नावामुळेच त्याच्या कथानकाविषयी उत्सुकता निर्माण झाली आहे. "शोले" चित्रपटाचे थरारक कथानक, त्यातील कलाकारांच्या दमदार अभिनयामुळे व्यक्तिरेखा अजरामर झाल्या. त्यामुळेच "शोले" चित्रपट आजही अविस्मरणीय आहे. "शोले" चित्रपटाच्या याच आठवणींना "हजारवेळा शोले पाहिलेला माणूस" हा चित्रपट सलाम करणार आहे.

कोणते कलाकार दिसणार?

'हजारवेळा शोले पाहिलेला माणूस' या चित्रपटात ज्येष्ठ अभिनेते दिलीप प्रभावळवकर, सोनाली कुलकर्णी, सिद्धार्थ जाधव, प्राजक्ता दातार, मिलिंद शिंदे, किशोर कदम, बालकलाकार श्रीरंग महाजन यांच्या प्रमुख भूमिका असून अभिनेते समीर धर्माधिकारी व आनंद इंगळे हे पाहुण्या कलाकाराच्या भूमिकेत आहेत. चित्रपटाचं लेखन आणि दिग्दर्शन हृषिकेश गुप्ते यांनी केलं आहे. अमोल गोळे यांनी छायांकन, रोहन रोहन,स्वरुप आनंद भालवणकर, वरुण लिखाते यांनी संगीत तर विनोद पाठक यांनी संकलनाची जबाबदारी निभावली आहे. शंकरैय्या दोराईस्वामी यांनी नृत्यदिग्दर्शन तर क्रिएटिव्ह डायरेक्टर शंकरैय्या दोराईस्वामी आणि विनोद पाठक आहेत.
वाचा: बॉलिवूडच्या 'या' सुपरस्टारला बिग बॉसची ऑफर, एका भागासाठी निर्माते देणार होते ३.५ कोटी

सिद्धार्थ जाधवने त्याच्या अधिकृत इन्स्टाग्राम अकाऊंटवर 'हजारवेळा शोले पाहिलेला माणूस' चित्रपटाचे मोशन पोस्टर शेअर केले आहे. हे पोस्टर शेअर करत त्याने, ‘हजारवेळा शोले पाहिलेला माणूस... "शोले" चित्रपटाच्या सुवर्ण महोत्सवी वर्षाच्या पदार्पणानिमित्त घेऊन आलो आहोत आगामी "हजार वेळा शोले पाहिलेला माणूस" या चित्रपटाची रिलीज डेट...! हा आयकॉनिक सिनेमा प्रेक्षकांच्या भेटीला येत आहे… २९ नोव्हेंबरला’ असे कॅप्शन दिले आहे.

'हजारवेळा शोले पाहिलेला माणूस' कधी होणार प्रदर्शित?

'हजारवेळा शोले पाहिलेला माणूस' हा चित्रपट २९ नोव्हेंबर २०२४पासून मोठ्या पडद्यावर येत आहे. या चित्रपटाविषयी अनेक महोत्सवांमध्ये ऐकल्यानंतर प्रेक्षकांमध्ये उत्सुकता शिगेले पोहोचली आहे. तसेच या चित्रपटातील सिद्धार्थ जाधवच्या अभिनायचे झालेले कौतुक प्रेक्षकांमधील उत्सुकता ताणत आहे. आता सर्व प्रेक्षक २९ नोव्हेंबरची वाट पाहात आहेत.