TMKOC : ‘जेठालाल’ने का पकडली असित मोदीची कॉलर? शो सोडण्याची धमकीही दिली! ‘तारक मेहता...’चे वाद चव्हाट्यावर

अभिनेते दिलीप जोशी हे ‘तारक मेहता का उल्टा चष्मा’ या मालिकेचे प्रमुख कलाकार आहेत. दिलीप या मालिकेत ‘जेठालाल’ची भूमिका साकारत आहेत. आता या शोशी संबंधित सूत्रांनी दिलेल्या माहितीनुसार, दिलीप जोशी यांचा असित मोदी यांच्यासोबत जोरदार वाद झाला आहे. हे प्रकरण हाणामारीपर्यंत पोहोचले होते आणि दिलीप जोशी यांनी यावेळी शो सोडण्याची धमकी दिली.

नेमकं प्रकरण काय?

मिळालेल्या माहितीनुसार, दिलीप जोशी आणि असित मोदी यांच्यात ऑगस्ट महिन्यात भांडण झाले होते. कलाकारांच्या सुट्ट्यांवरून दोघांमध्ये जोरदार वाद झाला होता, असे सांगितले जात आहे. सूत्रांनी दिलेल्या माहितीनुसार, दिलीप जोशी आपल्या सुट्ट्यांबद्दल निर्मात्यांनी आपल्याशी बोलण्याची वाट पाहत होते, पण असित याबद्दल बोलायला तयार नव्हते. या प्रकरणी दिलीप जोशी प्रचंड संतापले होते.

TMKOC : असित कुमारनं फोन केला आणि नको नको ते बोलला! ‘त्या’ दिवशी नेमकं काय घडलं ‘तारक मेहता’नं सांगूनच टाकलं

दिलीपने पकडली कॉलर!

प्रॉडक्शनशी संबंधित सूत्रांनी एका वेब पोर्टलला माहिती देताना सांगितले की, ‘कुश शाहच्या म्हणजेच गोलीच्या शूटिंगचा तो शेवटचा दिवस होता. दिलीपजी सुट्टीसाठी असित परत येऊन त्यांच्याशी बोलण्याची वाट पाहत होते. पण असितभाई आले आणि सरळ कुशला भेटायला गेले. ही गोष्ट दिलीपजींना रुचली नाही. दिलीपजींना खूप राग आला आणि दोघांमध्ये वाद सुरू झाला. या भांडणात दिलीपजींनी असित मोदींची कॉलर पकडली आणि शो सोडण्याची धमकी दिली. मात्र, असित भाई यांनी त्यांना शांत केले.’ 

दोघांचे भांडण कसे मिटले हे अद्याप कळू शकलेले नाही. तसेच हे वृत्त सूत्रांच्या हवाल्याने दिल्याचे म्हटले जात आहे. दिलीप जोशी किंवा असित मोदी यांच्याकडून याबाबत कोणतीही अधिकृत प्रतिक्रिया आलेली नाही. दोघांमध्ये नेमकं काय झालं, हे अजूनही समोर आलेलं नाही.

‘तारक मेहता का उल्टा चष्मा’ ही मालिका गेल्या १५ वर्षांपासून प्रेक्षकांचे भरपूर मनोरंजन करत आहे. दररोज संध्याकाळी ८.३० वाजता ही मालिका सब टीव्हीवर प्रसारित केली जाते.