Chhaava : 'छावा'वर चालली सेन्सॉर बोर्डाची कात्री; विकी कौशलच्या चित्रपटातून नेमकं काय काय हटवलं?

बोर्डाने ‘छावा’च्या निर्मात्यांना मराठा योद्ध्यांना साडी नेसताना दाखवलेला सीन काढून टाकण्यास सांगितले आहे. याव्यतिरिक्त, 'मुगल सल्तनत का जहर' हा संवाद 'उस समय, कई शासक और सल्तनत खुद को जिंदा रखने की कोशिश कर रहे थे' असा बदलण्यात आला आहे. याशिवाय, 'खून तो आखिर मुगलों का ही है' हे शब्द 'खून तो है औरंग का ही' असे बदलण्यात आले. 'हरामजादों' आणि 'हरामजादा' सारखे काही शब्द म्यूट करण्यात आले तर 'आमेन' ऐवजी 'जय भवानी' असे शब्द उच्चारण्यात आले आहेत.

छावा मधील वादग्रस्त लेझिम सीन

'छावा' या चित्रपटात अभिनेता विकी कौशल 'छत्रपती संभाजी महाराजां'ची भूमिका साकारत आहे आणि अभिनेत्री रश्मिका मंदाना 'महाराणी येसूबाईं'ची भूमिका साकारत आहे. या चित्रपटाच्या ट्रेलरमध्ये एक दृश्य दाखवण्यात आले होते, ज्यामध्ये विकी कौशल आणि रश्मिक मंदाना महाराष्ट्राच्या सांस्कृतिक वारशाशी संबंधित पारंपारिक खेळ 'लेझिम'वर नाचताना दाखवण्यात आले होते. त्या सीन विरोधात लोकांनी आक्षेप घेतल्यानंतर चित्रपटाच्या दिग्दर्शकाने ते दृश्य चित्रपटातून काढून टाकले.

Chhaava Movie : 'छावा'तून छत्रपती संभाजी महाराजांचा 'तो' सीन काढून टाकणार! लक्ष्मण उतेकरांनी दिली ग्वाही

या विषयी बोलताना विकी कौशल म्हणाला की, 'आम्ही चित्रपटावर काम सुरू केल्यावर शिवगर्जना अर्थात छत्रपती शिवाजी महाराजांच्या शौर्याबद्दलच्या घोषणा केल्याशिवाय एकही दिवस कामाची सुरुवात देखील केली नाही. चित्रपटातील लेझिमचा भाग फक्त २०-३० सेकंदांचा होता. तो केवळ कथेचा भाग नव्हता, तर तो आपल्या संस्कृतीला जगभर घेऊन जाण्याचा प्रयत्न होता. छत्रपती संभाजी महाराज हे जनतेचे राजा होते आणि जर कोणी त्यांना आपल्यासोबत लेझिम खेळायला सांगितले असेल, तर राजांनी ते नक्कीच केले असेल. पण जर समस्त शिव प्रेमींना वाटत असेल की, हे चुकीचे आहे... तर ते चित्रपटाच्या कथेसाठी महत्त्वाचे नाही, म्हणून आम्ही ते काढून टाकले आहे'.

'छावा'ची हवा!

'छावा' चित्रपटाबद्दल बोलायचे झाले तर, अभिनेता अक्षय खन्ना देखील या चित्रपटात मुख्य भूमिका साकारताना दिसला आहे. हा चित्रपट एक ऐतिहासिक चित्रपट असणार आहे, जो छत्रपती संभाजी महाराजांच्या इतिहास मोठ्या पडद्याच्या माध्यमातून जगभरात पोहोचवणार आहे. १६८१ मध्ये राज्याभिषेकापासून सुरू झालेल्या शूर मराठा राजाच्या गौरवशाली इतिहासाला जगभरात पोहोचवण्यासाठी या चित्रपटाची निर्मिती करण्यात आली आहे. 'छावा' हा चित्रपट १४ फेब्रुवारी रोजी थिएटरमध्ये प्रदर्शित होणार आहे.