Box Office Collection: पुन्हा प्रदर्शित झालेल्या 'करण अर्जुन'ने बॉक्स ऑफिसवर मारली बाजी, 'पुष्पा'ला टाकले मागे

निर्मात्यांच्या नियोजित चित्रपटांच्या कमाईचे आकडे जाहीर करणाऱ्या 'सचनिल्क' या प्लॅटफॉर्मने एका अहवालात म्हटले आहे की, २४ नोव्हेंबर रोजी चित्रपटगृहात प्रदर्शित झालेले पुष्पा - द राइज आणि करण अर्जुन या दोन्ही चित्रपटांनी बॉक्स ऑफिसवर चांगली कमाई केली आहे. चित्रपटगृहात दोन्ही चित्रपट पाहण्यासाठी लोक गर्दी करत आहेत. शाहरुख खान आणि सलमान खानचा करण अर्जुन हा चित्रपट देशभरात २००० स्क्रीन्सवर प्रदर्शित झाला आहे.

करण अर्जुनचे किती केली कमाई?

निर्मात्यांनी ओपनिंग वीकेंडसाठी एवढ्या मोठ्या संख्येने स्क्रीन बुक केल्या असल्या तरी त्या गोष्टीचे व्यवसायात रूपांतर होताना दिसत नाही. चित्रपटाचे ओपनिंग ग्रॉस कलेक्शन १ कोटी रुपयेही होऊ शकले नाही. प्रदर्शनाच्या दिवशी या चित्रपटाने ३० लाख रुपयांची कमाई केली आणि दुसऱ्या दिवशी ही कमाई जवळपास अर्ध्या पेक्षाही कमी झाली. रविवारी या चित्रपटाने जवळपास ४० लाख रुपयांची कमाई केली आहे. या चित्रपटाने पहिल्या वीकेंडमध्ये जवळपास १.६० कोटींची कमाई केली आहे. पण त्याची तुलना 'पुष्पा - द राइज'शी केली तर ती किती आहे चला जाणून घेऊया.
वाचा: कोणी पत्नीचे दागिने गहाण ठेवले तर कोणी राहते घर; कर्जात बुडाले होते 'हे' मराठी कलाकार, पण...

पुष्पा सिनेमाने किती केली कमाई?

अल्लू अर्जुनच्या पुष्पा - द राइज या चित्रपटाचे ओपनिंग वीकेंड कलेक्शन फक्त ७० लाख रुपये केले आहे. पहिल्या दिवशी चित्रपटाने केवळ २० लाख रुपये कमावले. दुसऱ्या दिवशी हा आकडा २५ लाखांवर गेला. तिसऱ्या दिवशीही कमाई तशीच राहिली. म्हणजेच शाहरुख खान आणि सलमान खानचा 'करण अर्जुन' पुष्पा - द राइज या चित्रपटापेक्षा सरस ठरताना दिसत आहे. ट्रेड एक्सपर्टच्या मते, 'पुष्पा - द राइज' फारशी कमाई करू शकला नाही याचे एक कारण म्हणजे या चित्रपटाविषयी लोकांमध्ये जागरूकता निर्माण करण्यात अपयश आले आहे. निर्मात्यांचे संपूर्ण लक्ष सध्या पुष्पा - द रूल वर आहे, जो 5 डिसेंबररोजी प्रदर्शित होणार आहे.