Naseeruddin Shah: दिलीप कुमार यांच्यामुळे घरातून पळून आलेले नसीरुद्दीन शाह 'असे' झाले अभिनेता! वाचा किस्सा
Naseeruddin Shah Birthday: अभिनेते नसीरुद्दीन शाह हे घर सोडून पळून आले होते. पण दिलीप कुमार त्यांना ओरडले म्हणून नसीरुद्दीन शाह घडले. आज २० जुलै रोजी ज्येष्ठ अभिनेते नसीरुद्दीन शाह यांचा वाढदिवस आहे. त्यानिमित्ताने जाणून घेऊया त्यांच्याविषयी...
‘जिंदगी ना मिलेगी दोबारा’, ‘जाने तू या जाने ना’, ‘जुनून’, ‘आक्रोश’, ‘द डर्टी पिंक्चर’ अशा अनेक चित्रपटांमध्ये काम करणारे ज्येष्ठ अभिनेते म्हणजे नसीरुद्दीन शाह. आज २० जुलै रोजी नसीरुद्दीन शाह यांचा वाढदिवस आहे. त्यांनी आजवर अनेक चित्रपटांमध्ये काम केले आहे, काही चित्रपटांची निर्मिती केली आहे तर काही चित्रपटांचे दिग्दर्शनही केले आहे. जवळपास ४५ वर्षांपेक्षा जास्त काळ इंडस्ट्रीमध्ये काम करणारे नसीरुद्दीन शाह हे घर सोडून निघून आले होते. करिअरच्या सुरुवातीला त्यांना अभिनेते दिलीप कुमार ओरडले आणि नसीरुद्दीन शाह यांचे आयुष्य बदलले.
मराठमोळे अभिनेते किरण माने यांनी नसीरुद्दीन शाह यांचा किस्सा सांगितला होता. 'पन्नास वर्ष उलटून गेली ह्या गोष्टीला ! अजमेरचं एक वांड पोरगं. पिच्चरचं लै याड. घरातनं पळून मुंबईला आलं. 'हिरो' बनायला. आईबाप टेन्शनमधी. लै शोधला. पत्ताच लागंना. बापाकडं अजमेरच्या दर्ग्याचं व्यवस्थापन होतं. अभिनेते दिलीपकुमार यांच्या बहिनी सकीना आपा आनि सईदा या दोघींचं अजमेरला सारखं येनजानं असायचं. त्यामुळं ह्या फॅमिलीची वळख होती. पोरगं नक्की मुंबैला गेलं म्हनून त्यांनी फोन करून त्यांच्या कानावर ही गोष्ट घातली. सईदानं मुंबैचं पोलीस खातं कामाला लावून त्या पोराला शोधून काढलं. पोरानंबी तंवर फिल्मलाईनमध्ये लै धक्के खाल्ले होते. सगळ्या स्वप्नांचा चुराडा झाला होता...' असे किरण माने म्हणाले.
पुढे ते म्हणाले, 'सईदानं त्याला गाडीत बसवलं आन् थेट पाली हिलच्या दिलीपकुमारजींच्या बंगल्यावर घिवून आली...सकीना आपानं झाप झाप झापला. पोरानंबी रडारड केली, माफी मागीतली... गेस्ट रूममधी त्याची तात्पुरती रहान्याची सोय करन्यात आली. सकिनाआपाचा मानूस असल्यामुळं बंगल्यात मोकळेपनानं वावरायला परवानगी होती. नोकरचाकर अडवत नव्हते. ...पोरगं भिरीभिरी नजरंनं दिलीपकुमारला शोधायला लागलं. पन अजून दिलीपकुमार दिसला नव्हता. शुटिंगसाठी बाहेरगांवी होता. हाॅलमधी सहा-सात 'फिल्मफेअर'च्या ट्राॅफीज बघून पोरगं परत 'येडं' झालं ! घरात कुनी नसताना ट्राॅफी हातात घेऊन ॲवाॅर्ड मिळाल्याचं नाटक करायला लागलं. त्यानं ठरवलं, 'एक ना एक दिवस आपन हे मिळवायचं'. मग एका हातात 'फिल्मफेअर' घिवून दुसर्या हातानं हवेत हात हलवून प्रेक्षकांचं अभिवादन करत, खोटंखोटं ह्रदयस्पर्शी भाषन करून झालं !'
'...एक दिवस पोरगं सकाळी उठलं. सहज खिडकीतनं बाहेर बघितलं तर थेट दिलीपकुमार दिसला ! आग्ग्गाय्य्यायाया... साक्षात खुदाच दिसल्यागत झालं. दिलीपकुमार बागेत एकटे फिरत होते. आता यांना गाठून थेट पायच धरायचे. 'कायबी करा पन मला सिनेमात काम मिळवून द्या. मी परत अजमेरला जानार नाय, हितंच र्हानार तुमच्याकडं.' म्हनायचं. पोरगं दबकत-दबकत त्यांच्याजवळ गेलं.. दिलीपकुमारसायबांनी त्याला बघितलं, आन् त्यानं तोंड उघडेपर्यन्त साहेबांनीच 'लेक्चर' झाडलं ! लै चिडलेवते. "सिनेमात काम करणं सोपं नाही. लहान मुलांनी आधी शिक्षण पूर्ण करावं. असली भलती स्वप्नं बघू नयेत. हे मायाजाल आहे." वगैरे वगैरे लै बोलले... पोरगं काय बोलायच्या आत 'विषय संपला' असा हात केला आनि 'चल जा हितनं.रूममधी बस.' असंबी खुनावलं.'
वाचा: 'धर्मवीर २' चित्रपटामध्ये धुरळाच उडणार! मुख्यमंत्री एकनाथ शिंदे पडद्यावर झळकणार?
'दुसर्या दिवशी डेहराडून एक्सप्रेसमधून त्याला घरी, अजमेरला पाठवन्यात आलं... या घटनेनंतर पंध्रा-वीस वर्षांनी ह्योच पोरगा 'एन.एस.डी.' , 'एफ.टी.आय.आय.' वगैरेमधी अभिनयाचं रितसर शिक्षन घेऊन, सगळ्या तयारीनिशी मुंबईत आला.. आज त्यो 'महान अभिनेता' म्हनून वळखला जातो.. त्याचं नांव - 'नसीरूद्दीन शाह' ! ...योगायोग म्हणजे नंतर नसीरभाईंना दिलीपजींबरोबर काम करायची संधीबी मिळाली... 'कर्मा' पिच्चरमधी ! पन ल्हानपनच्या 'त्या' भेटीबद्दल बोलायचं धाडस मात्र नाय झालं नसीरभाईंचे... 'त्यांच्यातरी कशाला लक्षात र्हातंय ते', असं म्हनून नसिरभाईंनी सगळं मनातच ठेवलं. नंतरच्या काळात, आजपर्यन्त छोट्या गावांमधनं मुंबईला यिवून अभिनयक्षेत्रात कायतरी भारी करून दाखवन्याची स्वप्नं बघनार्या...' असे ही ते पुढे म्हणाले होते.
अभिनेता नसीरुद्दीन शाह यांनी आपल्या आयुष्यातील तब्बल ६० वर्षे चित्रपटसृष्टीला समर्पित केली असून, या काळात त्यांनी १००हून अधिक बॉलिवूड चित्रपट केले आहेत. त्यांच्या चित्रपट कारकिर्दीबद्दल बोलायचे, तर ते बॉलिवूडमधील एक अष्टपैलू अभिनेता आहेत. त्यांनी 'त्रिदेव', 'विश्वात्मा', 'जाने भी दो यारों', 'अ व्हेनस डे' आणि 'कर्मा' सारखे समीक्षकांनी आवडलेले चित्रपट केले आहेत. तर, दुसरीकडे 'डर्टी पिक्चर', 'इश्किया' आणि 'मोहरा' सारखे चित्रपट देखील त्यांनी यशस्वी केले.
संबंधित बातम्या