Bigg Boss Marathi 5: बिग बॉसने दिला मोठा धक्का! ९ लाख रुपये घेऊन स्पर्धक घराबाहेर; आता उरले टॉप ५

बिग बॉसच्या या ट्वीस्टमध्ये रितेश देशमुख याला एक बॅग घेऊन घरात पाठवण्यात आले होते. या ब्रीफकेसमध्ये ७ लाख रुपयांची रक्कम घेऊन रितेश घरात गेला. यासोबतच त्याने सगळ्या स्पर्धकांना बोलावून ही ऑफर सांगितली. मात्र, ७ लाख रुपये घेऊन खेळ सोडून घराबाहेर जाण्यास कुणीही तयार झालं नाही. त्यानंतर आणखी एक ट्वीस्ट आणत ही रक्कम वाढवण्यात आली. ७ लाखांच्या ब्रीफकेससोबतच आणखी एक २ लाखांची ब्रीफकेस ठेवण्यात आली. त्यामुळे ही रक्कम ७ लाखांवरून ९ लाखांवर गेली. तर, विजेत्याला मिळणारी रक्कम ही १४ लाख असणार होती. त्यामुळे या तुलनेत ९ लाख ही रक्कम देखील मोठी होती. आता ही रक्कम घेऊन कोण बाहेर पडणार याकडे सगळ्यांचे लक्ष लागले होते.

जान्हवी किल्लेकर पडली बाहेर!

रितेशने १,२,३ म्हणताच त्या स्पर्धकाने जाऊन बजर वाजवून ती ब्रीफकेस घ्यायची होती. रितेशचा काऊंट देताच जान्हवी किल्लेकर हिने पैशांची बॅग घेऊन खेळ सोडण्याचा निर्णय घेतला. तर, रितेशच्या हातातील पाकिटात देखील जान्हवीचे नाव निघाल्याने तिचा निर्णय अगदी अचूक ठरल्याचे सिद्ध झाले आहे. जान्हवीने स्व:खुशीने हे पैसे स्वीकारून घरातून बाहेर पडण्याचा निर्णय घेतला. या प्रवासासाठी तिने सगळ्यांचे आभार मानले.

जान्हवी किल्लेकर ही पहिल्या दिवसापासून या खेळात उतरली होती. इतकंच नाही, तर तिने आपल्या दमदार खेळाने प्रेक्षकांची मने देखील जिंकली. सुरुवातीच्या २ आठवड्यात तिने या घरात चांगलाच धुमाकूळ घातला होता. या काळात तिने अनेक चुकाही केल्या होत्या. ज्याची शिक्षा म्हणून तिला तुरुंगवासही भोगावा लागला होता. मात्र, यानंतर तिने आपला खेळ सुधारला आणि प्रेक्षकांच्या मनात जागा मिळवली.