'व्याख्या विख्खी वुख्खू' डायलॉग सुचला तरी कसा? अशोक मामांच्या आयकॉनिक संवादामागे आहे भन्नाट किस्सा!

८०-९०च्या काळातील चित्रपटांनी मराठी चित्रपट सृष्टीला एक वेगळी ओळख दिली. त्यांचे चित्रपट आजही प्रत्येक वयोगटाच्या प्रेक्षकांच्या मनावर राज्य करतात. अशाच तुफान गाजलेल्या चित्रपटांपैकी एक चित्रपट होता ‘धुमधडाका’. हा चित्रपट त्या काळातील एक अविस्मरणीय हिट चित्रपट ठरला होता. या चित्रपटातील कलाकारांचे अचूक टायमिंग, संवादांची विविधता आणि गोड विनोद प्रेक्षकांना आजही भरपूर हसवतात. विशेषत: अशोक सराफ यांच्या संवादांनी प्रेक्षकांना खळखळून हसवले. त्यांच्या या चित्रपटातील गाजलेल्या संवादांपैकी एक संवाद होता 'व्याख्या,विख्खी,वुख्खू'च्या मागे एक भन्नाट किस्सा आहे.

माहिती आहे का राज कपूर यांनी केले आहे 'या' मराठी सिनेमामध्ये काम, अशोक सराफ होते मुख्य भूमिकेत

कसा सुचला 'हा' डायलॉग?

साधारणत: तीन शब्द असलेला हा संवाद तुफान गाजला होता. 'व्याख्या,विख्खी,वुख्खू' हे तीन शब्द, जे कधीच या चित्रपटाच्या स्क्रीप्टमध्ये नव्हते, ज्यांचा काहीही अर्थ नाही, त्यांनी तुफान प्रसिद्धी मिळवली. खरंतर हा संवाद कधीच त्यात नव्हता. अशोक सराफ यांनी एका मुलाखतीत किस्सा सांगताना म्हटले की, 'धुमधडाका'मध्ये त्यांनी महेश कोठारे यांच्या मित्राची आणि वडिलांची दुहेरी भूमिका साकारली होती. एका दृश्यात, महेशचे वडील म्हणून धनाजी वाकडे यांच्या घराकडे जात असताना, अशोक सराफ त्या घरच्या माळीसारख्या दिसणाऱ्या माणसाला विचारतात की, 'मालक कुठे आहेत?' यावर तो माणूस 'मीच मालक आहे', असे उत्तर देतो. यावेळी गोंधळून गेलेल्या अशोक सराफ यांनी खोकला येत असल्याने थोडा खोकल्याचा आवाजात काढला, त्यातून निघाले हे तीन शब्द 'व्याख्या,विख्खी,वुख्खू', ज्यांनी प्रेक्षकांच्या मनावर राज्य केले.

‘व्याख्या,विख्खी,वुख्खू’ने इतिहास घडवला!

'व्याख्या,विख्खी,वुख्खू' हे शब्द इतके लोकप्रिय होतील याची कधीच कल्पनाही त्यांना आली नव्हती. या संवादाने इतके यश मिळवले की, सोशल मीडियावर तरुणाईमध्ये तो ट्रेंड बनला. याच शब्दांवर आधारित टीशर्ट्स देखील बाजारात आले, ज्याने हे संवाद आणखी लोकप्रिय केले. ‘धुमधडाका’ आणि अशोक सराफ यांच्या अशा गमतीदार अभिनयाने त्यांचे प्रत्येक संवाद प्रेक्षकांच्या मनावर कायमचे छाप पाडून गेले.