हिंदुत्वाशी गद्दारी करणाऱ्यांना क्षमा नाही! अंगावर काटा आणणारा ‘धर्मवीर २’ चित्रपटाचा ट्रेलर प्रेक्षकांच्या भेटीला!

'आपल्या संघटनेचा माज आहे तो भगवा रंग' या वाक्यापासून सुरू होणारा ‘धर्मवीर २’ चित्रपटाचा ट्रेलर पहिल्या फ्रेमपासूनच प्रेक्षकांना गुंतवून ठेवतो. सर्वसामान्यांमध्ये राहणारे, सर्वसामान्यांसाठी झटणारे, भगव्यासाठी आणि हिंदुत्त्वासाठी लढणारे दिघेसाहेब पुन्हा एकदा या ट्रेलरमध्ये दिसले आहेत. 'तुझ्या आणि हिंदुत्त्वामध्ये मी जरी आलो, तरी मला बाजूला सारून हिंदुत्त्वाला मिठी मार' या दिघे साहेबांच्या तोंडी असणाऱ्या डायलॉगने तर अंगावर काटा उभा राहतो. ट्रेलरमध्ये एकनाथ शिंदेही दिसले आहेत. ‘धर्मवीर २’ चित्रपटाची टॅगलाईन 'साहेबांच्या हिंदुत्त्वाची गोष्ट' असल्यानं आता या चित्रपटातून काय दाखवलं जाणार याची उत्कंठा आता अधिकच वाढली गेली आहे.

२०२२ला ‘धर्मवीर’ चित्रपटाचा पहिला भाग आला, जो सुपरहिट झाला. दिघे साहेबांचे कार्य खूप मोठे आहे, जे केवळ एका भागत दाखवणे शक्य नाही. साहील मोशन आर्ट्सचे मंगेश जीवन देसाई आणि झी स्टुडिओजचे उमेश कुमार बन्सल यांनी ‘धर्मवीर २’ या चित्रपटाची निर्मिती केली आहे. लेखन आणि दिग्दर्शनाची जबाबदारी प्रवीण तरडे यांनी निभावली आहे. या चित्रपटाच्या टीझरला प्रेक्षकांकडून तुफान प्रतिसाद मिळाला आहे. त्यामुळे चित्रपटाच्या ट्रेलरबाबत प्रचंड उत्सुकता होती.

TRP Report: सायलीच्या मालिकेने पुन्हा मारली बाजी, तर तेजश्री प्रधानच्या मालिकेलाही मिळाली जागा! पाहा टीआरपी रिपोर्ट

त्या पावलांवर जीव टाकून आम्ही काम करतो!

‘दिघे साहेबांच्या पावलावर पाऊल नाही, तर त्या पावलांवर जीव टाकून आम्ही काम करतो आहे. या चित्रपटात एक डायलॉग आहे ‘कार्यकर्ता घरात नाही तर लोकांच्या दारात शोभून दिसतो’ कारण नेत्याने लोकांच्या सुख-दुःखात, अडी-अडचणीत त्यांच्यासोबत उभे राहावे. प्रसाद ओक यांनी साकारलेली भूमिका अप्रतिम आहे, जी साकारणे तेवढे सोप्पे नाही. कारण, त्यांचा दिघे साहेबांसोबत तसा कधी भेटण्याचा संबंध आला नाही. मागच्या भागापेक्षा या भागात माझी भूमिका साकारलेले क्षितीश दाते यांचे काम छान झाले आहे. पहिला सिनेमा जसा यशस्वी झाला त्यापेक्षाही हा चित्रपट डबल हीट होईल, अशा मी संपूर्ण टिमला शुभेच्छा देतो’, असे महाराष्ट्राचे मुख्यमंत्री एकनाथ शिंदे यांनी सांगितले.

मला पण चित्रपट काढायचाय पण...

‘गुरु पौर्णिमेच्या पूर्वसंध्येला दिघे साहेबांच्या जीवनावर आधारित ‘धर्मवीर २’ या चित्रपटाचा ट्रेलर रिलीज करण्यात आला आहे. ‘हिंदुत्वाशी गद्दारी करणाऱ्यांना क्षमा नाही’ ही चित्रपटाची टॅगलाईन जरी असली तरी, शिंदेसाहेब असो किंवा आम्ही सर्व असू, आमच्या जीवनाची टॅगलाईन सुद्धा हीच आहे. दिघे साहेबांच्या शिकवणी प्रमाणेच शिंदे साहेबांनी ज्याप्रमाणे महाराष्ट्राची धुरा समर्थपणे सांभाळली आहे, निश्चितच धर्मवीर आनंद दिघे साहेब आणि स्व.हिंदुहृदयसम्राट शिवसेनाप्रमुख बाळासाहेब ठाकरे हे स्वर्गातून आशीर्वाद देत असतील. कारण, या दोघांनाही विचारांची गद्दारी मान्य नव्हती. मलाही सिनेमा काढायचा आहे. पण, अजून थोडा वेळ आहे. कारण, मी जेव्हा सिनेमा करेन, तेव्हा अनेकांचे मुखवटे फाटतील आणि खरा चेहरा बाहेर येईल. चित्रपटाचा ट्रेलर पाहून आता चित्रपट पाहण्यासाठी मी उत्सुक असल्याचे, महाराष्ट्राचे उपमुख्यमंत्री देवेंद्र फडणवीस यांनी सांगितले. ‘धर्मवीर २’ हा चित्रपट येत्या ९ ऑगस्टला मराठी आणि हिंदी या दोन भाषांमध्ये जगभरात प्रदर्शित केला जाणार आहे.