Aai Aani Baba Retire Hot Aahet: निवेदिता सराफ यांच्या मालिकेचा प्रोमो पाहून प्रेक्षकांना आठवली जुनी अरुंधती! म्हणाले...

‘आई आणि बाबा रिटायर होत आहेत!’ असं या मालिकेचं नाव असून, या मालिकेत अभिनेत्री निवेदिता सराफ आणि अभिनेते मंगेश कदम हे मुख्य भूमिकेत दिसणार आहेत. अद्याप या मालिकेतील इतर कलाकारांची नावे गुलदस्त्यात ठेवण्यात आली आहेत. नुकत्याच प्रेक्षकांच्या भेटीला आलेल्या या प्रोमोमध्ये निवेदिता सराफ एका आईच्या भूमिकेत दिसत आहेत. त्यांनी एका अशा आईची भूमिका साकारली आहे, जी घरासाठी सतत धावपळ करत असते. अगदी मुलगा आणि सुनेच्या डब्यापासून ते नातवंडांच्या शाळेच्या तयारीपर्यंत ती सगळं काही करत आहे. दुसरीकडे, बाबा म्हणजेच मंगेश कदम आता त्यांच्या कामातून रिटायर होत आहेत. तर, कामातून निवृत्तीनंतर आरामात गावी जाऊन राहायचं असं त्यांनी ठरवलं आहे.

एकाच वेळी प्रदर्शित होणार दोन नव्या पौराणिक मालिका, वाचा कधी आणि कुठे पाहायला मिळणार

अरुंधतीची आठवण का आली?

मात्र, आता आईला बाबांचा हा निर्णय पटलेला नाही. आपल्या मुलांना आणि घराला सोडून गावी जाणं आईला पटलेलं नाही. त्यामुळे आता काय घडणार हे मालिकेतूनच कळणार आहे. मात्र, ‘आई आणि बाबा रिटायर होत आहेत!’ या मालिकेचा नवा प्रोमो पाहून प्रेक्षकांना नेटकऱ्यांना ‘आई कुठे काय करते’ या मालिकेच्या सुरुवातीला दिसलेल्या अरुंधतीची आठवण आली आहे. हा प्रोमो रिलीज होताच आता त्यावर भरभरून कमेंट्स येत आहेत.

प्रेक्षक म्हणतायत...

‘आई आणि बाबा रिटायर होत आहेत!’ या मालिकेच्या प्रोमोवर कमेंट करताना एका नेटकऱ्याने लिहिले की, ‘अरुंधती अल्ट्रा प्रो मॅक्स लवकरच येत आहे.’ तर, आणखी एकाने लिहिले की, ‘आई कुठे काय करते २.०’. ‘आई बाबांना कधीच मुलं आणि सुना रिटायर होऊ देत नाहीत. हाच मालिकेचा कॉन्सेप्ट दिसतोय. छान’, ‘आसावरी २.०’, ‘बागबानची स्टोरी नक्कीच’ अशा कमेंट्स पाहायला मिळत आहेत.