मराठी बातम्या  /  निवडणुका  /  Narendra Modi Exclusive interview: महागाई आणि बेरोजगारीवर काय बोलले पंतप्रधान नरेंद्र मोदी

Narendra Modi Exclusive interview: महागाई आणि बेरोजगारीवर काय बोलले पंतप्रधान नरेंद्र मोदी

Haaris Rahim Shaikh HT Marathi
May 12, 2024 02:41 PM IST

Narendra Modi Exclusive Interview: लोकसभा निवडणुकीच्या पार्श्वभूमीवर पंतप्रधान नरेंद्र मोदी यांनी दैनिक ‘हिंदुस्थान’चे संपादक शशी शेखर आणि मदन जायरा यांना विशेष मुलाखत दिली. या मुलाखतीत मोदींनी देशात बेरोजगारी आणि महागाईसारख्या मुद्द्यांवर चर्चा केली.

Prime Minister Narendra Modi exclusive interview
Prime Minister Narendra Modi exclusive interview (HT_PRINT)

 

ट्रेंडिंग न्यूज

शशी शेखर आणि मदन जायरा,

दैनिक हिंदुस्तान

 

प्रश्नः बेरोजगारी आणि महागाईवर योग्य चर्चा होत नाही, असे अनेक निरीक्षकांचे मत आहे. तुमचे मत काय आहे?

-महागाई आटोक्यात आणणे आणि रोजगार निर्मितीबाबत आमच्या सरकारचा ट्रॅक रेकॉर्ड उत्कृष्ट आहे. यूपीए सरकारच्या दुसऱ्या कार्यकाळात वार्षिक सरासरी महागाई दुहेरी आकड्यात होती, हे सर्वांनाच माहिती आहे. जिथे यूपीएने जनतेला दुहेरी आकडी महागाई दिली, तिथे एनडीए सरकारने कोविड महामारी होऊनही महागाईवर नियंत्रण ठेवले. रोजगार निर्मितीबद्दल बोलायचे झाले तर यावरही खूप चांगले काम झाले आहे.

सरकारी नोकऱ्यांचेच उदाहरण घ्या. आम्ही जे रोजगार मेळावे घेत आहोत, त्यातून लाखो रोजगार निर्मिती होत आहे. १० लाख सरकारी नोकऱ्या निर्माण करण्यासाठी ही मोहीम असल्याचे मी आधी नमूद केले होते. अशा अनेक रोजगार मेळाव्यांमध्ये मी स्वत: सहभागी झालो आहे. गेल्या दहा वर्षांत झालेल्या विकासकामेही तुम्ही पहा. पूर्वी आपण मोबाइल निर्मितीत कुठेही नव्हतो. पण आज आपण जगातील दुसऱ्या क्रमांकाचे सर्वात मोठे मोबाइल उत्पादक झालो आहोत. सर्वात महत्वाची गोष्ट म्हणजे आपण पूर्वी मोबाइलचे आयातदार होतो. आता मोबाइल फोनचे निर्यातदार देश झालो आहोत.

वंदे भारत ट्रेन असो किंवा टॉय मॅन्युफॅक्चरिंग, अनेक गोष्टी भारतात बनवल्या जात आहेत. या काळात स्टार्ट अप, इलेक्ट्रिक वाहने अशा अनेक क्षेत्रात प्रगती झाली आहे. आज आपण जगातील तिसऱ्या क्रमांकाची स्टार्ट-अप इकोसिस्टम आहोत. २०१४ मध्ये आपल्याकडे फक्त १०० स्टार्ट अप होते, आज हा आकडा १००,००० च्या आसपास आहे. या सर्व क्षेत्रांत मोठ्या प्रमाणात रोजगारनिर्मिती झाली आहे.

याशिवाय स्वतंत्र भारतात पायाभूत सुविधांच्या विकासाचे सर्वात मोठे मिशन आम्ही चालवले आहे. दरवर्षी पायाभूत सुविधा क्षेत्रात विक्रमी गुंतवणूक होत असते. विमानतळांची संख्या दुप्पट झाली आहे. महामार्गांची उभारणी विक्रमी वेगाने होत आहे. आमच्या सरकारच्या कार्यकाळात मेट्रो असलेल्या शहरांची संख्या चौपटीने वाढली आहे. एवढ्या मोठ्या प्रमाणावर पायाभूत सुविधांच्या विस्तारामुळे अनेक क्षेत्रांत रोजगार निर्मितीला चालना मिळाली आहे. लघु आणि मध्यम उद्योगांनाही आम्ही प्रोत्साहन दिले आहे. कोट्यवधी लोकांनी मुद्रा कर्ज योजनेचा लाभ घेऊन प्रथमच आपला व्यवसाय सुरू केला आहे.

वार्षिक पीएलएफएस डेटा स्पष्टपणे दर्शवितो की २०१७ ते २०२३ दरम्यान कामगारांच्या संख्येत ५६ % वाढ झाली. तर बेरोजगारी ३.२ टक्क्यांच्या ऐतिहासिक नीचांकी पातळीवर आली आहे. आज आपला देश जगातील सर्वात वेगाने वाढणारी मोठी अर्थव्यवस्था आहे. आणि ही वाढ रोजगार निर्मिती करणाऱ्या क्षेत्रांमुळे झाली आहे.

मी फक्त काही तथ्ये आणि आकडेवारी शेअर करत आहे. मी तुम्हाला हेही आठवण करून देऊ इच्छितो की, जर तुम्ही २०१४ पूर्वीच्या काँग्रेस सरकारच्या कार्यकाळावर नजर टाकली, तर ना विकासाची चिन्हे होती ना नोकऱ्या होत्या.

प्रश्नः राजकारण आणि प्रशासनात तुम्ही अनेक प्रयोग केले आहेत. तुमच्या तिसऱ्या टर्ममध्ये तुमची पहिली प्राथमिकता काय असणार?

-हा एक छान प्रश्न आहे. यशस्वी रेस्टॉरंट चालवणारा कोणी आपल्या यशाची रेसिपी काय आहे हे सांगतो का? ही नेहमीच आश्चर्याचा धक्का देणारी गोष्ट असते. त्यामुळे तुम्ही जरा थांबा. ज्या क्षणी आमचे सरकार परत येईल, त्या क्षणी आम्ही पुन्हा कामाला लागू, आणि केवळ पहिले पाऊल नाही, तर आमचे प्रत्येक पाऊल जनता, गरीब आणि मानवजातीच्या हितासाठी समर्पित असेल.

आणखी एक गोष्ट, आपण मान्य केले आहे की, गेल्या १० वर्षांत आम्ही अनेक नाविन्यपूर्ण आणि प्रयोग केले आहेत, त्याचे उत्तम परिणाम झाले आहेत. पण मी आधी म्हटल्याप्रमाणे हा ट्रेलर आहे. विकसित भारताचे स्वप्न साकार करण्यासाठी आपल्याला अनेक मोठे निर्णय घ्यावे लागतील. त्याची झलक तिसऱ्या टर्मच्या पहिल्या १०० दिवसांत दिसू शकते.

प्रश्नः तुम्ही गेल्या आठवड्यात सॅम पित्रोदा यांनी केलेल्या टिप्पणीला प्रतिसाद दिला. प्रज्वल रेवन्ना यांचे मुद्दे, झारखंडचे मंत्री आलमगीर यांच्या सहकाऱ्यांकडून वसूल करण्यात आलेली अविश्वसनीय रक्कम, मंगळसूत्र, मंदिर-मशीद हे सर्व मुद्दे उपस्थित करण्यात आले आहेत. निवडणुकीत अशा मुद्द्यांमुळे जनतेचे खरे मुद्द्यांवरून लक्ष विचलित होत नाहीत का?

-ही व्यक्ती (पित्रोदा) काँग्रेसच्या शाही (राजघराण्याच्या) अत्यंत जवळची आहे, हे सर्वांनाच ठाऊक आहे. त्यामुळे काँग्रेस सत्तेच्या जवळ पोहोचली तर वारसा कर किंवा भारतीयांच्या दिसण्याकडे विभाजनकारी आणि वर्णद्वेषी चष्म्यातून पाहण्याचा दृष्टिकोन देशासाठी घातक ठरेल. त्यामुळे हे मुद्दे जनतेसमोर आणून त्यावर चर्चा व्हायला हवी. धर्माच्या आधारावर आरक्षण देण्याच्या आणि राज्यघटनेचा अवमान करण्याच्या टप्प्यावर ते पोहोचले आहेत. अनुसूचित जाती, जमाती, ओबीसींचे आरक्षण हिसकावून इतरांना देण्याच्या या षडयंत्रावर चर्चा व्हायला नको का? व्होट बँकेच्या राजकारणाचा काँग्रेसचा ट्रॅक रेकॉर्ड, त्याचे महत्त्व आणि त्याची विधाने सर्वांसमोर आहेत. लोकांच्या मालमत्तेचा एक्स-रे करून त्याचे पुनर्वितरण करू, असे जेव्हा ते म्हणतात, तेव्हा त्याचा अर्थ काय? अशा मानसिकतेच्या धोक्यांविषयी चर्चा व्हायला नको का?

किंबहुना कॉंग्रेसच्या राजपुत्राची धोकादायक विधाने आणि त्यांच्या जाहीरनाम्यातील विध्वंसक विचारांचा प्रसारमाध्यमांनी खोलवर अभ्यास केलेला नाही, याचे मला आश्चर्य वाटते. त्यामुळे मला हे मुद्दे उपस्थित करावे लागले. त्यांचा ढोंगीपणा बघा. एकीकडे कॉंग्रेसचे राजकुमार सर्वसामान्यांच्या मालमत्तेचा एक्स-रे करण्याबाबत बोलत आहेत, तर दुसरीकडे त्यांच्या पक्षाच्या जवळच्या लोकांकडून रोख रकमेने भरलेले ट्रक वसूल केले जात आहेत. हे मुद्दे निवडणुकीशी निगडित आहेत आणि मला ते मांडायचे आहेत.

आता तुम्ही प्रज्वल रेवण्णा यांचा मुद्दा उपस्थित केला आहे. मी हे स्पष्ट करू इच्छितो की, अशा मुद्द्यांबाबत आमची शून्य सहिष्णुता आहे. असे आरोप अत्यंत गांभीर्याने घेण्याची गरज असून अशा गुन्हेगारांवर कडक कायदेशीर कारवाई व्हायला हवी.

पण एक गोष्ट सांगा, आताच अशा निंदनीय घटना घडल्या आहेत का? हे अनेक वर्षे घडते आहे आणि याच काळात काँग्रेसने प्रज्वल रेवण्णा यांच्या पक्षाशीही युती केली होती. याचा अर्थ त्यांना सर्व काही माहित होते आणि ते वर्षानुवर्षे गप्प बसले होते. आता ते केवळ निवडणुकीसाठी याचा वापर करत आहेत. राज्य सरकार त्यांचे आहे. ते याविरोधात आधी कारवाई करू शकले असते. परंतु त्यांनी तसे केले नाही. यावरून महिलांची सुरक्षितता आणि प्रतिष्ठा याबाबत त्यांच्या बांधिलकीबाबत तीव्र अभाव असल्याचं दिसून येतो. एवढा महत्त्वाचा मुद्दा हा कॉंग्रेससाठी केवळ राजकीय खेळ आहे, हे घृणास्पद आहे.

प्रश्नः विरोधकांना राष्ट्रीय स्तरावर आघाडी बांधण्यात अपयश आले असले तरी कॉंग्रेस आणि प्रादेशिक पक्षांनी ३०० हून अधिक जागांवर संयुक्त उमेदवार उभे केले आहेत. यातून तुम्हाला काही आव्हान जाणवतं का?

-भारताने अनेक दशके अस्थिर सरकारांकडून निर्माण होणाऱ्या समस्या पाहिल्या आहेत. तेथे सत्तेशिवाय कोणताही समान अजेंडा नसतो. त्या सर्व अस्थिरतेच्या केंद्रस्थानी काँग्रेस होती. त्या काळातील घोटाळे, धोरणलकवा, दहशतवादापुढे शरणागती, अर्थव्यवस्थेची दुरवस्था हे सारे जनतेच्या मनात ताजे आहे.

'मोदी हटाओ' शिवाय INDI आघाडीची कोणतीही समान दृष्टी नसल्याचे लोक पाहत आहेत. विरोधकही देत नसतील अशाप्रकारे ते दिवस-रात्र एकमेकांना शिव्या देत असतात. पण मोदींना विरोध करण्यासाठी ते सर्व एकाच व्यासपीठावर येत. याउलट गेल्या दहा वर्षांत देशाला मजबूत आणि स्थिर सरकारचे फायदे दिसले. झपाट्याने बदलणाऱ्या आणि आव्हानात्मक जगात भारताला स्थिर, सुरक्षित आणि मजबूत असणे गरजेचे आहे, हे लोकांना ठाऊक आहे. त्यामुळे काँग्रेस आणि भाजप युती कितीही जागा लढवली तरी जनतेचा विश्वास जिंकू शकेल, असे मला वाटत नाही.

WhatsApp channel