धोनीचे शेवटचे आयपीएल? विराट कोहलीच्या कृतीने दोघांची IPL मधील शेवटची भेट असल्याची चर्चा

वरिष्ठ खेळाडूंच्या सन्मानार्थ ज्युनिअर खेळाडू अनेकदा हस्तांदोलन करताना आपल्या टोप्या उतरवतात, पण यावेळी ब्रॉडकास्टरला त्यामागे वेगळीच भावना दिसली. त्यामुळं त्याने सामन्यानंतरचा धोनी आणि कोहलीचा फोटो आपल्या सोशल मीडिया हँडलवर पोस्ट करत लिहिलं, '‘वन लास्ट टाइम '

स्टार स्पोर्ट्सच्या या पोस्टवर चाहते विविध प्रतिक्रिया देत आहेत, तुम्हीही पाहा-

कसा होता आरसीबी विरुद्ध सीएसके सामना?

नाणेफेक गमावल्यानंतर प्रथम फलंदाजी करताना रॉयल चॅलेंजर्स बेंगळुरूने २० षटकांत ५ गडी गमावून २१३ धावा केल्या. विराट कोहली आणि जेकब बेथेल यांनी पहिल्या विकेटसाठी ९७ धावांची भागीदारी करत आरसीबीला वादळी सुरुवात करून दिली. दोन्ही फलंदाजांनी अर्धशतकेही झळकावली, पण सलामीवीर बाद झाल्यानंतर मधली फळी चांगलीच फ्लॉप झाली. अखेरीस रोमारिओ शेफर्डने १४ चेंडूत ५३ धावांची तुफानी खेळी करत संघाला २०० च्या पुढे नेले.

या धावसंख्येचा पाठलाग करताना चेन्नई सुपर किंग्जकडून आयुष म्हात्रेने ९४ तर रवींद्र जडेजाने नाबाद ७७ धावांची खेळी केली. पण त्यांना संघाला विजयी करता आले नाही. लुंगी एन्गिडी आरसीबीचा सर्वात यशस्वी गोलंदाज ठरला आणि त्याने ३ गडी बाद केले. जडेजाला तीन जीवनदान मिळूनही अखेरच्या षटकात फटकेबाजी करण्यात तो कमी पडला व बेंगळुरूने हा सामना २ धावांनी जिंकला.