IND vs AUS : पर्थमध्ये टीम इंडियाचा कसून सराव, नेटमध्ये बुमराह आणि कोहलीमध्ये रंगली चुरस, व्हिडीओ पाहा

तत्पूर्वी, या ५ सामन्यांच्या कसोटी मालिकेसाठी टीम इंडिया जोरदार तयारी करत आहे. भारत आणि ऑस्ट्रेलिया यांच्यातील पहिला कसोटी सामना पर्थयेथे खेळला जाणार आहे. वाका स्टेडियमला चारही बाजूंनी जाळ्यांनी झाकण्यात आले असून अशा परिस्थितीत सराव सत्र पाहण्याची संधी क्रिकेट चाहत्यांना मिळत नाही. 

सराव सत्राचे वार्तांकन करणेही प्रसारमाध्यमांना अवघड होत चालले आहे. पण अशा परिस्थितीतही स्टार क्रिकेटपटू विराट कोहली आणि जसप्रीत बुमराह यांच्या सरावाचा व्हिडिओ सोशल मीडियावर लीक झाला आहे. क्रीडा पत्रकार क्लो अमांडा बेली यांनी विराट आणि बुमराहच्या सरावाचा एक व्हिडिओ शेअर केला आहे, जो वेगाने व्हायरल होत आहे.

या व्हिडिओमध्ये विराट कोहली वेगवान आक्रमणाचा सामना करताना दिसत आहे, तर बुमराहने नेटवरही जोरदार गोलंदाजी केली आहे. या व्हिडिओमध्ये शुभमन गिल आणि सरफराज खान एकत्र बसलेले दिसत आहेत.

मालिकेतील पहिला कसोटी सामना २२ नोव्हेंबरपासून खेळला जाणार असून ही कसोटी मालिका सुरू होण्याच्या सुमारे दोन आठवडे आधी टीम इंडिया ऑस्ट्रेलियात दाखल झाली.

टीम इंडियाला नुकतीच न्यूझीलंडविरुद्धच्या घरगुती कसोटी मालिकेत ३-० अशा क्लीन स्वीपला सामोरे जावे लागले होते, त्यानंतर ही कसोटी मालिका भारतीय संघासाठी अधिक महत्त्वाची ठरली आहे. आयसीसी वर्ल्ड टेस्ट चॅम्पियनशिपच्या फायनलमध्ये टीम इंडियाला पोहोचायचं असेल तर त्याला किमान ४-० च्या फरकाने मालिका जिंकावी लागेल.

न्यूझीलंड कसोटी मालिकेपूर्वी भारतीय संघ अंतिम फेरीगाठण्याचा प्रबळ दावेदार होता आणि वर्ल्ड टेस्ट चॅम्पियशीपच्या गुणतालिकेतही अव्वल स्थानी कायम होता, पण मालिका ०-३ ने गमावल्यानंतर संपूर्ण खेळ बदलला आहे. वर्ल्ड टेस्ट चॅम्पियनशिपफायनलपूर्वी टीम इंडियाची ही शेवटची टेस्ट सीरिज आहे.