USA vs Ban 1st T20 : टी-20 वर्ल्डकपआधी अमेरिकेने दाखवला रंग, बांगलादेशचा धुव्वा उडवत सर्व संघांना दिली वॉर्निंग
USA vs Bangladesh T20 Highlights : पहिल्या टी-२० सामन्यात अमेरिकेविरुद्ध च्या निराशाजनक पराभवानंतर बांगलादेशचा कर्णधार नजमुल हुसेन शांतो म्हणाला की, मंगळवारी झालेल्या सामन्यात आम्ही चांगली फलंदाजी करू शकलो नाही.
अमेरिकेच्या क्रिकेट संघाने इतिहास रचला आहे. कोरी अँडरसन (३४*) आणि हरमीत सिंग (३३*) यांच्या उत्कृष्ट खेळीच्या बळावर अमेरिकेने मंगळवारी (२१) पहिल्या T20 आंतरराष्ट्रीय सामन्यात बांगलादेशचा धुव्वा उडवला. ह्युस्टन येथे खेळल्या गेलेल्या सामन्यात बांगलादेशने प्रथम फलंदाजी करताना २० षटकात ६ गडी गमावून १५३ धावा केल्या. प्रत्युत्तरात अमेरिकेने १९.३ षटकांत ५ गडी गमावून लक्ष्य गाठले.
हा विजय अमेरिकेसाठी ऐतिहासिक होता कारण दोन्ही संघांमध्ये पहिला T20 आंतरराष्ट्रीय सामना खेळला जात होता. बांगलादेशवर पहिला विजय मिळवून अमेरिकेने इतिहास रचला.
आगामी T20 विश्वचषक २०२४ पूर्वी तयारीच्या दृष्टीने ही मालिका दोन्ही संघांसाठी महत्त्वाची आहे. अमेरिकेने पहिला सामना जिंकून ३ टी-20 सामन्यांच्या आंतरराष्ट्रीय मालिकेत १-० अशी आघाडी घेतली आहे. उभय संघांमधील मालिकेतील दुसरा सामना गुरुवारी (२३ मे) ह्युस्टन येथे खेळवला जाणार आहे.
USA ची दमदार कामगिरी
१५४ धावांच्या लक्ष्याचा पाठलाग करताना अमेरिकेला स्टीव्हन टेलर (२८) आणि कर्णधार मोनांक पटेल (१२) यांनी दमदार सुरुवात केली. मोनांक दुर्दैवी ठरला आणि धावबाद होऊन पॅव्हेलियनमध्ये परतला. यानंतर टेलरने अँड्रिस गॉस (२३) सोबत दुसऱ्या विकेटसाठी ३८ धावांची भागीदारी केली. गौसला मुस्तफिजुर रहमानकडे झेलबाद करून रिशाद हुसेनने ही भागीदारी मोडली.
येथून बांगलादेशने जोरदार पुनरागमन केले आणि पुढच्या १३ धावांत २ गडी बाद केले. मुस्तफिजुर रहमानने प्रथम स्टीव्हन टेलरला महमुदुल्लाहकरवी झेलबाद केले. त्यानंतर रहमानने आरोन जोन्सला (४) नजमुल हुसेन शांतोकरवी झेलबाद केले. नितीश कुमार (१०) देखील क्रीझवर टिकू शकला नाही आणि शरीफुल इस्लामचा बळी होऊन पॅव्हेलियनमध्ये परतला.
सामना जिंकवणारी भागीदारी
येथून कोरी अँडरसन आणि हरमीत सिंग यांनी सुत्रे हाती घेतली. दोन्ही फलंदाजांनी बांगलादेशी गोलंदाजांना कोणतीही संधी दिली नाही आणि शेवटच्या षटकात ३ चेंडू शिल्लक असताना लक्ष्य पार केले. कोरी अँडरसनने २५ चेंडूत २ षटकारांच्या मदतीने नाबाद ३४ धावा केल्या. हरमीत सिंगने १३ चेंडूंत २ चौकार आणि ३ षटकारांच्या मदतीने नाबाद ३३ धावा केल्या. बांगलादेशकडून मुस्तफिजुर रहमानने दोन बळी घेतले. शरीफुल इस्लाम आणि रिशाद हुसेन यांना प्रत्येकी एक विकेट मिळाली.
फलंदाजांची फ्लॉप कामगिरी
तत्पूर्वी, या सामन्यात प्रथम फलंदाजी करण्यासाठी आलेल्या बांगलादेशला लिटन दास (१४) आणि सौम्या सरकार (२०) यांनी दमदार सुरुवात केली. मात्र दोन्ही सलामीवीर ३४ धावांवर पॅव्हेलियनमध्ये परतले. जसदीप सिंगने दासला एलबीडब्ल्यू आऊट केले. स्टीव्हन टेलरने सरकारला कुमारकरवी झेलबाद केले. कर्णधार नजमुल हुसेन शांतोला (३) यष्टिचित करून टेलरने बांगलादेशला तिसरा धक्का दिला.
तौहिद हदयाने अर्धशतक केले
बांगलादेशचा मधल्या फळीतील फलंदाज तौहीद हडे (५८) याने एक टोक धरून आपले अर्धशतक पूर्ण केले. पण दुसऱ्या टोकाला अनुभवी शाकिब अल हसनचा निभाव लागला नाही. शाकिब ६ धावा करून धावबाद होऊन पॅव्हेलियनमध्ये परतला. महमुदुल्लाहने (३१) हदयाला साथ दिली आणि दोघांनी पाचव्या विकेटसाठी ६७ धावांची भागीदारी केली.
अमेरिकेच्या गोलंदाजांचं कौतुक
महमुदुल्लाहला कुमारकरवी झेलबाद करून सौरभ नेत्रावलकरने बांगलादेशला पाचवा धक्का दिला. तौहीद हा शेवटचा बाद झालेला फलंदाज होता, जो अली खानच्या गोलंदाजीवर टेलरच्या हातून झेलबाद झाला. तौहीदने ४७ चेंडूंत ४ चौकार आणि २ षटकारांच्या मदतीने ५८ धावा केल्या.
अमेरिकेकडून स्टीव्हन टेलरने सर्वाधिक दोन बळी घेतले. सौरभ नेत्रावलकर, अली खान आणि जसदीप सिंग यांना प्रत्येकी १ विकेट मिळाली. बांगलादेशला कमी धावसंख्येवर रोखल्याबद्दल अमेरिकन गोलंदाजांचे कौतुक झाले.
संबंधित बातम्या