U19 Asia Cup : १३ वर्षांच्या वैभव सूर्यवंशीचा क्रिकेटच्या मैदानात धुमाकूळ; अर्धशतकी खेळी करताना पाडला षटकारांचा पाऊस

वैभव सूर्यवंशीनं केलेल्या ७६ धावांच्या बळावर भारतानं युएईवर १० गडी राखून विजय मिळवला. वैभव हा आक्रमक फलंदाजीसाठी ओळखला जातो. त्याच शैलीत त्यानं ही खेळी केली. वैभवनं ४६ चेंडूत नाबाद ७६ धावा ठोकल्या. त्यात तीन चौकार आणि सहा षटकारांचा समावेश होता. ऑस्ट्रेलियाविरुद्धच्या युवा कसोटीत शतक झळकावल्यानंतर वैभवनं मोठी खेळी केली नव्हती. त्याची कसर आज भरून निघाली.

हेही वाचा: नेपाळ प्रीमियर लीगमध्ये गरजली गब्बरची बॅट! चौकार, षटकार ठोकत केल्या ७१ धावा

भारत सेमीफायनलमध्ये

यूएईला १० गडी राखून मात देत भारतानं हा सामना सहज जिंकला. ५०-५० षटकांचा सामना टी-२० शैलीत खेळून भारतानं वेळेपूर्वीच सामना संपवला. भारतानं प्रथम युएईला ४४ षटकांत १३७ धावांत ऑलआऊट केलं आणि त्यानंतर अवघ्या १६.१ षटकांत १४३ धावा करून सामना जिंकला. या विजयासह भारतानं सेमीफायनलमध्ये दिमाखात प्रवेश केला आहे. १९ वर्षांखालील आशिया चषक स्पर्धेची उपांत्य फेरी ६ डिसेंबर रोजी श्रीलंकेविरुद्ध होणार आहे.

भारत-पाकिस्तान सामना होणार?

भारतीय संघ पाकिस्तान, युएई आणि जपानसह गटात होता. भारत आणि पाकिस्ताननं अ गटातून उपांत्य फेरीत प्रवेश केला आहे. उपांत्य फेरीत भारताचा सामना श्रीलंकेच्या, तर पाकिस्तानचा सामना बांगलादेशशी होणार आहे. पाकिस्तान आणि श्रीलंकेनं एकही सामना न हरता उपांत्य फेरी गाठली आहे. श्रीलंकेनं बांगलादेश, अफगाणिस्तान आणि नेपाळला पराभूत केलं, तर पाकिस्तानने भारत, युएई आणि जपानला पराभूत केलं आहे. सेमीफायनलमध्ये कोणते संघ बाजी मारतात यावर अंतिम सामना भारत-पाकिस्तानमध्ये होणार की अन्य संघांत ते स्पष्ट होणार आहे.

हेही वाचा: सारा तेंडुलकर झाली ‘सचिन तेंडुलकर फाऊंडेशन ’ची संचालक! आता सांभाळणार संस्थेची मोठी जबाबदारी