Tilak Varma : तिलक वर्मा मुंबई इंडियन्स आणि BCCI कडून किती मानधन घेतो, २२ व्या वर्षीच झाला कोट्यवधींचा मालक
Tilak Varma Batting Highlights : तिलक वर्माने दक्षिण आफ्रिकेविरुद्धच्या तिसऱ्या T20 सामन्यात १०७ धावा केल्या. त्याचे आंतरराष्ट्रीय कारकिर्दीतील हे पहिले शतक होते.
टीम इंडियाचा युवा स्टार तिलक वर्मा याने ऑगस्ट २०२३ मध्ये टीम इंडियाकडून आंतरराष्ट्रीय पदार्पण केले. पदार्पणाच्या वर्षभरानंतरही त्याला जी प्रसिद्धी मिळायला हवी होती, ती मिळवता आली नव्हती. पण दक्षिण आफ्रिकेविरुद्धच्या टी-20 मालिकेतील तिसऱ्या सामन्यात त्याच्या १०७ धावांच्या खेळीमुळे तिलक वर्माला रातोरात सुपरस्टार खेळाडूचा दर्जा मिळाला आहे.
तिलक वर्मा २०२२ पासून मुंबई इंडियन्सकडून खेळत आहेत. MI फ्रँचायझीने त्याला IPL २०२५ साठी रिटेन केले आहे. पुढील हंगामात खेळण्यासाठी त्याला ८ कोटी रुपये पगार मिळेल, तर २०२४ मध्ये त्याचा पगार केवळ १.७ कोटी रुपये होता. म्हणजे तिलक वर्माचा आयपीएलचा पगार एकाच मोसमात साडेचार पटीने वाढला आहे.
दुसरीकडे, त्याला भारतीय क्रिकेट संघाकडून खेळण्यासाठी वार्षिक १ कोटी रुपये मिळतात कारण त्याचा बीसीसीआयच्या श्रेणी सी यादीमध्ये समावेश आहे.
२०२१-२०२२ च्या देशांतर्गत हंगामात चांगली कामगिरी करून तिलक वर्मा प्रसिद्धीच्या झोतात आला. त्या मोसमात, पहिल्या विजय हजारे ट्रॉफीच्या पाच सामन्यांमध्ये १८० धावा केल्या आणि ४ विकेट्सही घेतल्या. दुसरीकडे, सय्यद मुश्ताक अली टी-20 ट्रॉफीमध्ये ७ सामने खेळताना त्याने २१५ धावा केल्या.
देशांतर्गत हंगामातील उत्कृष्ट कामगिरीनंतर, त्याला आयपीएल करार मिळाला कारण MI ने त्याला २०२२ मध्ये १.७ कोटी रुपयांची बोली लावून विकत घेतले. त्याला आतापर्यंत हाच पगार मिळत होता, पण आता त्याला आयपीएल २०२५ साठी ८ कोटी रुपये मिळतील.
जसप्रीत बुमराहपासून हार्दिक पांड्यापर्यंत सर्वांना मोठा स्टार बनवण्यात मुंबई इंडियन्स फ्रँचायझीने महत्त्वपूर्ण योगदान दिले आहे. आता या यादीत तिलक वर्मा याचेही नाव जोडले गेले आहे. आयपीएलमध्ये एमआयकडून खेळताना त्याने ३८ सामन्यांमध्ये १,१५६ धावा केल्या आहेत. इंडियन प्रीमियर लीगमध्ये त्याची सरासरी ४० च्या आसपास आहे आणि लीगमधील त्याची सर्वोच्च धावसंख्या ८४ धावा आहे.
