BGT : वेळ न पाळल्यानं रोहित शर्मा भडकला, यशस्वी जयस्वालला हॉटेलमध्येच सोडून गेली टीम इंडियाची बस

बुधवारी ११ डिसेंबरला टीम इंडिया पहाटे अ‍ॅडलेडमधील आपल्या हॉटेलमधून निघाली आणि ब्रिस्बेनला विमानानं रवाना झाली. बॉर्डर-गावस्कर करंडक (BGT 2024-25) ची तिसरी कसोटी शनिवार १४ डिसेंबरपासून रिव्हर सिटीच्या प्रतिष्ठित गाबा मैदानावर खेळली जाणार आहे. विशेष म्हणजे भारतीय खेळाडूंना विमानतळावर घेऊन जाणारी बस यशस्वी जयस्वालशिवाय निघाली. हा सगळा प्रकार कर्णधार रोहित शर्माच्या सांगण्यावरून घडला, कारण यशस्वीला टीम हॉटेलमधून बाहेर यायला उशीर झाला होता.

हेही वाचा: सय्यद मुश्ताक अली स्पर्धेची आज क्वार्टर फायनल, कधी सुरू होणार सामना? कुठं पाहता येणार लाइव्ह?

क्रिकट्रॅकरच्या रिपोर्टनुसार, कर्णधार रोहित शर्मा यशस्वी जयस्वालच्या वागण्यावर नाराज असल्याचं दिसत होतं. ब्रिस्बेनला सकाळी १०.०५ वाजता संघाचं उड्डाण होणार असल्यानं ही बस स्थानिक वेळेनुसार सकाळी ८.३० वाजता विमानतळाच्या दिशेनं जाणं अपेक्षित होतं. सकाळी ८ वाजून २० मिनिटांनी भारतीय खेळाडू आणि सपोर्ट स्टाफ बसमध्ये चढू लागले. मात्र, यशस्वी जयस्वाल कुठंही दिसला नाही. बस गेटजवळ काही मिनिटे थांबल्यानंतर रोहित शर्मा खाली उतरला आणि त्यानं टीम मॅनेजर आणि संपर्क अधिकाऱ्याशी चर्चा केली.

थोड्या वेळानंतर कर्णधार रोहित शर्मा पुन्हा बसमध्ये चढला. रोहितच्या सांगण्यावरून ड्रायव्हर यशस्वी शिवाय सकाळी ८.५० च्या सुमारास बस विमानतळाकडं निघाला. बस सुटल्यानंतर सुमारे पाच मिनिटांनी डावखुरा फलंदाज हॉटेलमधून बाहेर पडला. मात्र, लवकरच यशस्वी संघाच्या सुरक्षा अधिकाऱ्यासोबत कारनं विमानतळावर पोहोचला आणि भारतीय संघासह ब्रिस्बेनला रवाना झाला. मात्र, या प्रसंगामुळं उलटसुलट चर्चा रंगली आहे.

हेही वाचा: सय्यद मुश्ताक अली ट्रॉफीत भारताची तोफ पुन्हा धडाडणार! मोहम्मद शमी क्वार्टर फायनल खेळणार