Aus vs Pak : बाबर आझमने टी-20 क्रिकेटमध्ये इतिहास रचला, सर्वाधिक धावांच्या बाबतीत कोहलीला मागे टाकले

आतापर्यंत तो तिसऱ्या क्रमांकावर होता, मात्र आता विराट कोहलीला मागे टाकत तो दुसऱ्या क्रमांकावर पोहोचला आहे. या यादीत रोहित शर्मा पहिल्या क्रमांकावर आहे. बाबरला जर रोहितला मागे टाकायचे असेल तर त्याला आणखी काही काळ थांबावे लागेल.

रोहित शर्मा पहिल्या क्रमांकावर 

टी-20 आंतरराष्ट्रीय क्रिकेटमध्ये सर्वाधिक धावा करणारा फलंदाज सध्या भारताचा रोहित शर्मा आहे. त्याने एकूण १५९ सामने खेळून ४२३१ धावा केल्या आहेत. या फॉरमॅटमध्ये त्याच्या नावावर ५ शतके आणि ३२ अर्धशतके आहेत. 

यानंतर आता बाबर आझमचा क्रमांक लागतो. आतापर्यंत बाबरने १२६ टी-20 आंतरराष्ट्रीय सामने खेळून ४१९२ धावा केल्या आहेत. लवकरच ते ४२०० चा आकडाही पार करेल.

ऑस्ट्रेलियाविरुद्धच्या तीन टी-२० सामन्यांच्या मालिकेतील शेवटच्या सामन्यात बाबरने विराट कोहलीला मागे टाकले. बाबरने २८ चेंडूत ४१ धावांची जलद खेळी केली आणि या डावात तो विराट कोहलीच्या पुढे गेला. बाबर ज्या पद्धतीने फलंदाजी करत होता, त्यावरून तो आज रोहितचा विश्वविक्रमही मोडेल असे वाटत होते, पण तसे होऊ शकले नाही आणि तो रोहितपेक्षा ३९ धावांनी पिछाडीवर आहे. 

बाबर आझम चांगल्या लयीत दिसत होता पण अॅडम जाम्पाने त्याला बाद करत पाकिस्तानला मोठा धक्का दिला.

बाबर आझमला पहिल्या क्रमांकावर येण्याची संधी 

बाबर आझमने या फॉरमॅटमध्ये टी-20 इंटरनॅशनलमध्ये आतापर्यंत ३ शतके आणि ३६ अर्धशतके झळकावली आहेत. विराट कोहली आता तिसऱ्या स्थानावर घसरला आहे. विराट कोहलीने १२५ टी-20 आंतरराष्ट्रीय सामने खेळून ४१८८ धावा केल्या आहेत.

या फॉरमॅटमध्ये त्याच्या नावावर फक्त एक शतक आहे, पण त्याने २८ अर्धशतके केली आहेत. विराट कोहली आणि रोहित शर्मा यांनी आता T20 आंतरराष्ट्रीय क्रिकेटमधून निवृत्ती घेतली आहे.

पण बाबर आझम खेळत आहे आणि पुढील काही काळ खेळत राहील. अशा परिस्थितीत त्याला रोहित शर्माला मागे टाकून खूप पुढे जाण्याची संधी असेल. बाबर किती दिवसात पहिल्या क्रमांकावर पोहोचणार हे पाहणे बाकी आहे.