SL vs AUS : स्टीव्ह स्मिथचं ३६ वे कसोटी शतक, सचिनचा खास विक्रम मोडला, श्रीलंकन गोलंदाजांची दयनीय अवस्था

ऑस्ट्रेलियन खेळाडू कॅरीने कसोटी कारकिर्दीतील दुसरे शतक झळकावले. वृत्त लिहिपर्यंत ऑस्ट्रेलियाने पहिल्या डावात ३०० धावांचा टप्पा ओलांडला होता. कॅरी आणि स्मिथ यांच्यात २२६ धावांची भागिदारी झाली होती.

SL VS AUS : स्टीव्ह स्मिथनं इतिहास रचला, अवघ्या ११६ कसोटीत रिकी पाँटिंगचा हा मोठा विक्रम मोडला

वृत्त लिहिपर्यंत स्टीव्ह स्मिथने ११८ धावा केल्या होत्या. या खेळीत त्याने ८ चौकार आणि १ षटकार मारला. तर कॅरीने ११ चौकार आणि २ षटकारांच्या मदतीने १२९ धावा केल्या होत्या.

स्टीव्ह स्मिथने मोडला सचिनचा विक्रम 

या खेळीनंतर स्टीव्ह स्मिथने सचिन तेंडुलकर याचा एक मोठा विक्रम मोडला आहे. सर्वात कमी कसोटी डाव खेळून ३६ शतके करणारा स्मिथ दुसरा खेळाडू ठरला आहे. स्मिथने यासाठी २०६ डाव खेळले आहेत. तर सचिनने २१८ डाव खेळून ३६ वे कसोटी शतक केले होते. या यादीत रिकी पाँटिंग अव्वल स्थानावर आहे. पाँटिंगने २०० डावात ३६ शतके झळकावली होती. कुमार संगकारा तिसऱ्या क्रमांकावर आहे. त्याने २१० डावात हा पराक्रम केला.

स्मिथ कोहलीचा विक्रम मोडू शकला नाही 

स्टीव्ह स्मिथ सर्वात जलद १७००० आंतरराष्ट्रीय धावा पूर्ण करणाऱ्या खेळाडूंच्या यादीत सामील झाला आहे. त्याने ४१० डावात हा पराक्रम केला. या यादीत स्मिथ नवव्या क्रमांकावर आहे. तर विराट कोहली अव्वल स्थानावर आहे. टीम इंडियाचा दिग्गज खेळाडू कोहलीने ३६३ डावात ही कामगिरी केली होती. या यादीत हाशिम आमला दुसऱ्या क्रमांकावर आहे. त्याने ३८१ डावात ही कामगिरी केली.

श्रीलंकेच्या पहिल्या डावात २५७ धावा

गाले स्टेडियमवर खेळल्या जात असलेल्या मालिकेतील दुसऱ्या कसोटी सामन्यात यजमान श्रीलंकेच्या संघाने नाणेफेक जिंकून प्रथम फलंदाजी करण्याचा निर्णय घेतला होता. यानंतर श्रीलंकेचे फलंदाज फारशी चांगली कामगिरी करू शकले नाहीत. श्रीलंकेचा पहिला डाव दुसऱ्या दिवशीच्या पहिल्या सत्रात २५७ धावांवर आटोपला.

श्रीलंकेच्या पहिल्या डावात दिनेश चंडीमलने ७४ धावांची खेळी केली तर कुसल मेंडिस ८५ धावा केल्या. ऑस्ट्रेलियाकडून नॅथन लायन, मिचेल स्टार्क आणि मॅथ्यू कुहनेमन यांनी प्रत्येकी ३ विकेट घेतले तर ट्रॅव्हिस हेडने एक विकेट घेतली आहे.