Sachin Tendulkar : सचिनचा अपर कट बघितला का? चाहत्यांना थेट शोएब अख्तरच आठवला, एकदा पाहाच!

इंडिया मास्टर्सचा कर्णधार सचिन तेंडुलकर याने १८ चेंडूत २५ धावा केल्या. या खेळीत सचिनने एक शानदार अपर कटचा फटका मारला. हा शॉट पाहून चाहत्यांची २२ वर्षांपूर्वीची एक आठवण ताजी झाली.

वास्तविक, सचिन तेंडुलकर याने २००३ च्या वर्ल्डकपमध्ये पाकिस्तानच्या शोएब अख्तर याला असाच अपर कट लगावला होता. तो चेंडू थेट प्रेक्षकांमध्ये जाऊन पडला होता. आता सचिनने २२ वर्षांनी पुन्हा एकदा अगदी तसाच फटका मारला. यावेळी गोलंदाज वेस्ट इंडिजचा जेरोम टेलर होता. 

जेरोम टेलरच्या चेंडूवर सचिनचा उत्कृष्ट अप्पर कट

वेगवान गोलंदाज जेरोम टेलर वेस्ट इंडिज मास्टर्ससाठी पॉवरप्लेचे शेवटचे षटक टाकण्यासाठी आला होता. या षटकात सचिन तेंडुलकरने आधी चौकार मारला. यानंतर त्याने उत्कृष्ट शैलीत अप्पर कट लगावून षटकार वसूल केला. सचिन तेंडुलकरचा अप्पर कट सोशल मीडियावर व्हायरल होत आहे.

इंडिया मास्टर्सने पटकावले जेतेपद

दरम्यान, इंटरनॅशन मास्टर्स लीग स्पर्धेच्या अंतिम सामन्यात प्रथम फलंदाजी करण्यासाठी आलेल्या वेस्ट इंडिज मास्टर्स संघाने २० षटकांत ७ गडी गमावून १४८ धावा केल्या. वेस्ट इंडिज मास्टर्ससाठी सलामीवीर ड्वेन स्मिथने ३५ चेंडूत ४५ धावा केल्या. तर लिंडन सिमन्सने ४१ चेंडूत ५७ धावांचे योगदान दिले.

वेस्ट इंडिज मास्टर्सच्या १४८ धावांना प्रत्युत्तर देताना इंडिया मास्टर्सने १७.१ षटकांत ४ गडी राखून लक्ष्य गाठले. इंडिया मास्टर्ससाठी अंबाती रायडूने ५० चेंडूत सर्वाधिक ७४ धावा केल्या. तर इंडिया मास्टर्सचा कर्णधार सचिन तेंडुलकरने १८ चेंडूत २५ धावा केल्या.