Pat Cummins : बॉर्डर-गावस्कर ट्रॉफीसाठी पॅट कमिन्सचा मास्टर प्लॅन? मालिकेच्या ३ महिन्यांपूर्वीच घेतला मोठा, वाचा

या मालिकेआधीच ऑस्ट्रेलियन संघातून एक मोठी बातमी समोर आली आहे. वास्तविक, ऑस्ट्रेलियाचा कसोटी कर्णधार पॅट कमिन्स याने बॉर्डर-गावस्कर ट्रॉफी लक्षात घेऊन ८ आठवड्यांचा ब्रेक घेतला आहे.

अमेरिकेतील मेजर लीग क्रिकेटमध्ये भाग घेतल्यानंतर कमिन्स नुकताच ऑस्ट्रेलियाला परतला. ऑस्ट्रेलियातील उन्हाळ्यातील व्यस्त वेळापत्रक लक्षात घेता त्याने स्वत:ला फ्रेश ठेवण्यासाठी विश्रांती घेण्याचा निर्णय घेतला आहे. याच कारणामुळे त्याची इंग्लंड दौऱ्यासाठी मर्यादित षटकांच्या संघात निवड झालेली नाही.

पॅट कमिन्स काय म्हणाला?

फॉक्स स्पोर्ट्सने कमिन्सच्या हवाल्याने म्हटले आहे की, 'ब्रेकनंतर परतल्यावर प्रत्येकाला फ्रेश वाटते. तुम्हाला कधीच पश्चाताप होत नाही.' तो म्हणाला, 'सुमारे १८ महिन्यांपूर्वी वर्ल्ड टेस्ट चॅम्पियनशिपच्या फायनलपासून मी सतत गोलंदाजी करत आहे. हा ब्रेक मला ७ किंवा ८ आठवडे विश्रांतीसाठी वेळ देईल. यानंतर मी ताजेतवाने होऊन परतेन आणि उन्हाळ्याची तयारी करू शकेन.

आम्ही ट्रॉफी जिंकण्यासाठी चांगल्या स्थितीत...

ऑस्ट्रेलियाने २०१७ पासून बॉर्डर गावस्कर ट्रॉफी जिंकलेली नाही आणि कमिन्स ही मालिका जिंकण्यासाठी आतुर आहे. तो म्हणाला, “मी अजून येथे ट्रॉफी जिंकलेली नाही. ही एक अशी ट्रॉफी आहे जी आजपर्यंत आमच्या संघाचे अनेक खेळाडू जिंकू शकलेले नाहीत. उन्हाळ्यात आमचे लक्ष्य ते जिंकण्याचे असेल.

भारतीय संघ खरोखरच चांगला आहे. आम्ही एकमेकांविरुद्ध बरेच क्रिकेट खेळतो आणि एकमेकांना चांगले समजतो पण मला वाटते की यावेळी आम्ही ट्रॉफी जिंकण्याच्या चांगल्या स्थितीत आहोत.

ऑलिम्पिकमध्ये खेळायचं आहे

कमिन्स सध्या T20 क्रिकेट सोडण्याच्या मनस्थितीत नाही आणि २०२८ च्या लॉस एंजेलिस ऑलिम्पिकमध्ये ऑस्ट्रेलियाला सुवर्णपदक जिंकून देण्यास मदत करू इच्छितो. ऑलिम्पिक २०२८ मध्ये क्रिकेटचा समावेश करण्यात आला आहे. तो म्हणाला, ‘ऑलिम्पिकबद्दल सगळेच उत्सुक आहेत. मलाही त्याचा एक भाग व्हायचे आहे. तोपर्यंत मी ३५ वर्षांचा असेन आणि आशा आहे की मी संघाचा एक भाग होईल.