IND vs BAN : मयंक यादवसह हे तीन खेळाडू आज आंतरराष्ट्रीय पदार्पण करणार? यातील एकजण गौतम गंभीरचा खूपच खास!

ग्वाल्हेरचे नवनिर्मित श्रीमंत माधवराव सिंधिया क्रिकेट स्टेडियम पहिल्या टी-20 चे आयोजन करण्यासाठी सज्ज आहे. या सामन्यातून एक-दोन नव्हे तर तीन युवा खेळाडू आंतरराष्ट्रीय क्रिकेटमध्ये पदार्पण करू शकतात.

वेगवान तोफ मयंक यादव

आयपीएल २०२४ मध्ये ताशी १५० किलोमीटर वेगाने गोलंदाजी करणाऱ्या मयंक यादवने सर्वांचे लक्ष वेधून घेतले होते, परंतु त्याच्या बरगड्यांमध्ये ताण आल्याने त्याला स्पर्धेतून माघार घ्यावी लागली होती. सामान्यत: कोणत्याही खेळाडूला राष्ट्रीय संघात स्थान मिळवण्यासाठी देशांतर्गत क्रिकेटमध्ये आपली तंदुरुस्ती सिद्ध करावी लागते, परंतु २२ वर्षीय मयंकला त्याच्या विशेष कौशल्यामुळे भारतीय संघात स्थान देण्यात आले आहे.

बांगलादेशविरुद्धच्या मालिकेत त्याचा फॉर्म आणि फिटनेस तपासला जाईल. तो ज्या अचूकतेने आणि नियंत्रणाने आयपीएलमध्ये गोलंदाजी करतो, त्याच अचूकतेने तो आंतरराष्ट्रीय स्तरावर गोलंदाजी करू शकतो का, हे पाहणे बाकी आहे.

नितीश कुमार रेड्डी

मुंबई आणि चेन्नई सुपर किंग्जचा अष्टपैलू खेळाडू शिवम दुबे पाठीच्या दुखापतीमुळे टी-20 मालिकेतून बाहेर पडला आहे. संघ व्यवस्थापनाने शिवम दुबेच्या जागी तिलक वर्माला नियुक्त केले आहे, परंतु आधीच संघात असलेला नितीश कुमार रेड्डी प्लेइंग इलेव्हनमध्ये स्थान मिळविण्यासाठी योग्य उमेदवार आहे.

IPL २०२४ मध्ये आपल्या स्फोटक फलंदाजीने तसेच मध्यमगती गोलंदाजीने सर्वांना वेड लावणारा रेड्डी आज भारतासाठी पहिला सामना खेळू शकतो.

गौतम गंभीरचा खास हर्षित राणा

आयपीएल २०२४ मध्ये कोलकाता नाईट रायडर्स १० वर्षांनंतर चॅम्पियन बनले. यामध्ये संघाचा मार्गदर्शक गौतम गंभीरचा जितका वाटा होता तितकाच यात युवा खेळाडू हर्षित राणाचाही हात होता.

हर्षित राणा हा एक वेगवान गोलंदाज आहे ज्याला चेंडू कसा स्विंग करायचा हे माहित आहे. त्याच्या मधल्या षटकांमध्ये विकेट घेण्याची क्षमता आहे. प्रशिक्षक बनताच गौतम गंभीरने त्याची भारतीय संघात निवड केली. हर्षितची झिम्बाब्वे दौऱ्यासाठी निवड झाली होती, पण त्याला एकही सामना खेळण्याची संधी मिळाली नाही. आज हर्षित राणा बांगलादेशविरुद्धच्या पहिल्या टी-20 मध्ये आंतरराष्ट्रीय क्रिकेटमध्ये पदार्पण करू शकतो.