WTC Points Table : ॲडलेड कसोटीत पराभव झाला, आता टीम इंडिया WTC फायनलमध्ये कशी पोहोचणार? समीकरण पाहा
Latest WTC Points Table : ॲडलेड कसोटीत भारताचा १० गडी राखून पराभव झाल्यानंतर वर्ल्ड टेस्ट चॅम्पियनशिपच्या अंतिम फेरीतील समीकरणे बरीच बदलली आहेत.
ॲडलेड कसोटीत भारताच्या पराभवानंतर वर्ल्ड टेस्ट चॅम्पियनशिपच्या गुणतालिकेत मोठा बदल झाला आहे. या पराभवामुळे भारत आता पहिल्या स्थानावरून तिसऱ्या स्थानावर घसरला आहे, तर ऑस्ट्रेलिया अव्वल स्थानावर आहे.
कांगारू संघाने ॲडलेडमध्ये भारताचा १० विकेटने पराभव केला आहे. या सामन्यानंतर वर्ल्ड टेस्ट चॅम्पियनशिप फायनलची समीकरणेही बदललेली दिसत आहेत.
ऑस्ट्रेलियाविरुद्धच्या पराभवानंतर टीम इंडियाच्या गुणांची टक्केवारी ५७.२९ वर आली आहे, ज्यामुळे टीम तिसऱ्या स्थानावर आली आहे. अव्वल स्थानावर पोहोचलेल्या ऑस्ट्रेलियाची टक्केवारी आता ६०.७१ झाली आहे.
भारताच्या पराभवामुळे दक्षिण आफ्रिकेलाही एका स्थानाचा फायदा झाला आहे. ते ५९.२६ गुणांच्या टक्केवारीसह दुसऱ्या स्थानावर आहे. आफ्रिकन संघाने दुसऱ्या कसोटीत श्रीलंकेचा पराभव केल्यास ते ऑस्ट्रेलियाला मागे टाकून पहिल्या क्रमांकावर पोहोचेल.
इंग्लंडविरुद्धची दुसरी कसोटी हरल्याने न्यूझीलंडच्या अंतिम फेरीत जाण्याच्या आशा संपल्या आहेत. इंग्लंड आणि न्यूझीलंड सध्या पाचव्या आणि सहाव्या स्थानावर आहेत. ५० गुणांच्या टक्केवारीत श्रीलंका सध्या चौथ्या स्थानावर आहे.
श्रीलंकेलाही अंतिम फेरीत जाण्याची संधी आहे. दुसऱ्या कसोटीत दक्षिण आफ्रिकेचा पराभव करून ऑस्ट्रेलियाला २-० ने पराभूत केले तरी अंतिम फेरी गाठण्यासाठी इतर सामन्यांच्या निकालांवर अवलंबून राहावे लागेल.
भारतासाठी WTC फायनलचं समीकरण
भारतीय संघाला कोणत्याही संघावर अवलंबून न राहता अंतिम फेरी गाठायची असेल, तर बॉर्डर-गावस्कर करंडक २०२४ मधील उर्वरित तीनही सामने जिंकावे लागतील. भारताचे आता जास्तीत जास्त १४६ गुण होऊ शकतात आणि त्यांची गुणांची टक्केवारी ६४.०३ च्या वर जाऊ शकत नाही.
दुसरीकडे, फायनलमध्ये जाण्याच्या ऑस्ट्रेलियाच्या आशा अधिक आहेत कारण त्यांचे अजून ५ कसोटी सामने बाकी आहेत. बॉर्डर-गावस्कर ट्रॉफीनंतर त्यांना श्रीलंकेविरुद्ध दोन कसोटी सामन्यांची मालिकाही खेळायची आहे.
पण WTC फायनल गाठण्यासाठी टीम इंडियासाठी परिस्थिती इतकी कठीण आहे की, ऑस्ट्रेलियाला ३-१ ने पराभूत केले तरी ते अंतिम फेरीत जाईल हे निश्चित सांगता येणार नाही. कारण, दुसऱ्या कसोटीत श्रीलंकेचा पराभव केल्यानंतर दक्षिण आफ्रिकेने आगामी कसोटी मालिकेत पाकिस्तानला २-० ने पराभूत केले तर ते गुणतालिकेत टीम इंडियाला मागे टाकतील. अशा स्थितीत आफ्रिकेचे अंतिम फेरीतील स्थान निश्चित होईल. दुसऱ्या स्थानासाठी भारत आणि ऑस्ट्रेलिया यांच्यात स्पर्धा होईल.
संबंधित बातम्या