श्रीसंतवर केरळ क्रिकेट असोसिएशनकडून ३ वर्षांची बंदी, संजू सॅमसनशी कनेक्शन असलेले काय आहे प्रकरण?

३० एप्रिल रोजी कोची येथे झालेल्या विशेष सर्वसाधारण सभेत हा निर्णय घेण्यात आल्याचे केसीएने एका निवेदनात म्हटले आहे. श्रीसंत सध्या केरळ क्रिकेट लीगमधील कोल्लम एरिस संघाचा सहमालक आहे.

या आधी त्याच्या वादग्रस्त वक्तव्याबाबत श्रीसंत, कोल्लम संघ, अलाप्पुझा संघाचे प्रमुख आणि अलाप्पुझा रेपल्स यांना कारणे दाखवा नोटीस बजावण्यात आली होती.

फ्रँचायझी संघांनी नोटीसला समाधानकारक प्रतिसाद दिल्याने पुढील कारवाई करण्यात आलेली नाही. परंतु संघ व्यवस्थापनातील सदस्यांची नियुक्ती करताना बरीच सावधगिरी बाळगण्याचा सल्ला दिला जाईल, असा निर्णय बैठकीत घेण्यात आला.

तसेच संजू सॅमसनचे वडील सॅमसन विश्वनाथ आणि अन्य दोघांवर संजू सॅमसनच्या नावाने बिनबुडाचे आरोप केल्याबद्दल नुकसान भरपाईचा दावा केला जाईल.

एका मल्याळम टीव्ही चॅनेलवरील चर्चेदरम्यान सॅमसन आणि केसीएशी संबंधित वक्तव्याबद्दल केसीएने दोन वेळा विश्वचषक विजेत्या संघातील खेळाडू असलेल्या श्रीसंतला नोटीस बजावली आहे.

केसीएने एका निवेदनात स्पष्ट केले आहे की, ही नोटीस सॅमसनला पाठिंबा देण्यासाठी नाही तर केसीएविरोधात दिशाभूल करणारी आणि मानहानीकारक टिप्पणी केल्याबद्दल देण्यात आली आहे.

श्रीसंतने टीव्ही कार्यक्रमात संजू सॅमसनला पाठिंबा देताना केरळ क्रिकेट असोसिएशनवर आरोप केले होते. सॅमसन आणि केरळच्या इतर खेळाडूंचा बचाव करण्याबाबतही श्रीसंत बोलला होता.

विजय हजारे करंडक स्पर्धेसाठी सॅमसनला केरळ संघातून वगळल्याबद्दल केसीएवर टीकेची झोड उठली होती. केसीएच्या या निर्णयाचा सॅमसनच्या चॅम्पियन्स ट्रॉफीसाठी भारतीय संघ निवडण्याच्या संधीवर परिणाम झाल्याचे बोलले जाते.