IPL Mega Auction : आर्चर, नेत्रावलकर आणि ग्रीन यांना आयपीएल लिलावातून का काढलं? खरं कारण आलं समोर, वाचा
IPL 2025 Mega Auction News In Marathi : आयपीएल २०२५ साठी खेळाडूंचा लिलाव २४ आणि २५ नोव्हेंबर रोजी जेद्दाह येथे होणार आहे. या लिलावात अनेक मोठी नावे दिसणार नाहीत.
IPL २०२५ च्या मेगा लिलावाला आता फार दिवस उरलेले नाहीत. आयपीएल २०२५ चा मेगा लिलाव २४ आणि २५ नोव्हेंबर रोजी सौदी अरेबियाच्या जेद्दाह येथे होणार आहे. या लिलावासाठी एकूण १५७४ खेळाडूंनी नोंदणी केली होती, त्यापैकी ५७४ खेळाडूंना आता लिलावासाठी निवडण्यात आले आहे.
आयपीएलने शॉर्टलिस्ट केलेल्या खेळाडूंची यादी जाहीर केली तेव्हा सर्वांनाच आश्चर्याचा धक्का बसला. कारण, शॉर्टलिस्ट केलेल्या खेळाडूंच्या यादीतून अनेक दिग्गज क्रिकेटपटूंची नावे गायब होती.
यातील सर्वात मोठे नाव म्हणजे, जोफ्रा आर्चर. इंग्लंडचा झंझावाती वेगवान गोलंदाज जोफ्रा आर्चरला आयपीएल २०२५ च्या मेगा लिलावासाठी निवडण्यात आलेले नाही. ऑस्ट्रेलियाचा स्टार अष्टपैलू कॅमेरून ग्रीनही शॉर्ट लिस्टमध्ये नाही. त्याचप्रमाणे भारताचा अमित मिश्रा, इंग्लंडचा जेसन रॉय आणि ख्रिस वोक्स आणि यूएसएचा सौरभ नेत्रावलकर यांना मेगा लिलावासाठी निवडण्यात आलेले नाही.
१) जोफ्रा आर्चर
इंग्लंडचा झंझावाती गोलंदाज जोफ्रा आर्चरला दुखापत असूनही मुंबई इंडियन्सने IPL २०२३ च्या लिलावात विकत घेतले. आर्चर आयपीएल २०२३ मध्ये फक्त ५ सामने खेळू शकला होता. तो अपेक्षेप्रमाणे कामगिरी करू शकला नाही आणि दुखापतीमुळे तो आयपीएल २०२४ मध्ये सहभागी होऊ शकला नाही. हा वेगवान गोलंदाज अनेकदा दुखापतग्रस्त झाला आहे. यावेळी आर्चरला लिलावासाठी शॉर्टलिस्ट करण्यात आलेले नाही.
२) बेन स्टोक्स
इंग्लंडचा महान अष्टपैलू खेळाडू बेन स्टोक्स देखील आयपीएल २०२५ च्या लिलावात दिसणार नाही. तथापि, स्टोक्सने आयपीएल २०२५ च्या मेगा लिलावासाठी नोंदणीही केली नव्हती.
३) कॅमेरून ग्रीन
ऑस्ट्रेलियाचा स्टार अष्टपैलू कॅमेरून ग्रीनलाही आयपीएल २०२५ च्या लिलावासाठी निवडण्यात आलेले नाही. ग्रीन पूर्णपणे तंदुरुस्त नाही आणि म्हणूनच त्याला शॉर्टलिस्ट केले गेले नाही. वास्तविक, ग्रीनला तंदुरुस्त होण्यासाठी सुमारे ६ महिने लागतील. या कारणास्तव कोणत्याही संघाने त्याला शॉर्टलिस्ट केले नाही.
४) अमित मिश्रा
भारताचा अनुभवी लेगस्पिनर अमित मिश्राही यावेळी लिलावात दिसणार नाही. गेल्या मोसमापर्यंत तो लखनौ सुपर जायंट्सचा भाग होता, परंतु त्याला आयपीएल २०२५ च्या लिलावासाठी निवडण्यात आले नाही.
५) जेसन रॉय
इंग्लंडचा स्फोटक सलामीवीर जेसन रॉय लिलावात अनेकवेळा विकला गेला, पण नंतर त्याने आपले नाव मागे घेतले. यावेळी मेगा लिलावासाठी रॉय यांना शॉर्टलिस्ट करण्यात आलेले नाही. जेसन रॉयला अपेक्षेप्रमाणे किंमत मिळाली नव्हती, त्यामुळे तो मागे खेळला नव्हता, असे म्हटले जाते.
६) सौरभ नेत्रावळकर
२०२४ च्या टी-20 विश्वचषकापासून भारतीय वंशाच्या सौरभ नेत्रावळकरची सतत चर्चा होत आहे. सौरभ नेत्रावलकरने २०२४ च्या T20 विश्वचषकात शानदार गोलंदाजी केली होती. तेव्हा असे मानले जात होते की त्याला या लिलावात मोठ्या रकमेत खरेदी केले जाऊ शकते, परंतु सौरभ नेत्रावलकरला आयपीएल २०२५ च्या मेगा लिलावासाठी निवडण्यात आलेले नाही.
७) ख्रिस वोक्स
इंग्लंडचा स्टार वेगवान गोलंदाज ख्रिस वोक्स देखील आयपीएल २०२५ च्या मेगा लिलावात दिसणार नाही. वोक्सलाही शॉर्टलिस्ट केलेले नाही. असे मानले जाते की वोक्सने त्याची मूळ किंमत जास्त ठेवली होती. या कारणास्तव त्याला लिलावासाठी निवडण्यात आले नाही.
