Ind vs Pak Tickets Price : तिकीट ८.५ लाखांना तर पार्किंग फी १ लाख रुपये, भारत-पाक सामन्यात मैदान रिकामं राहणार?
Ind vs Pak Tickets Price : भारत आणि पाकिस्तान यांच्यातील सामन्यांच्या तिकिटांची विक्री फार पूर्वीपासून सुरू झाली होती. चाहते ते ऑनलाइन बुक करू शकतात.
India Vs Pakistan T20 World Cup 2024 : टी-20 विश्वचषक २०२४ चा बहुचर्चित सामना भारत आणि पाकिस्तान यांच्यात न्यूयॉर्कमध्ये होणार आहे. हा सामना रविवारी (९ जून) संध्याकाळी होणार आहे. हा सामना न्यूयॉर्कमधील नासाऊ काउंटी इंटरनॅशनल स्टेडियमवर खेळला जाईल.
टीम इंडियाने पहिल्या सामन्यात आयर्लंडचा पराभव केला होता. तर पाकिस्तानला पहिल्या सामन्यात अमेरिकेविरुद्ध पराभव स्वीकारावा लागला होता. मात्र आता दोन्ही संघ एकमेकांविरुद्ध मैदानात उतरणार आहेत.
भारत आणि पाकिस्तान यांच्यातील सामन्यांच्या तिकिटांची विक्री फार पूर्वीपासून सुरू झाली होती. चाहते ते ऑनलाइन बुक करू शकतात.
दरम्यान, मीडिया रिपोर्ट्सनुसार, वर्ल्डकपचे आयोजक भारत-पाकिस्तान सामन्याची तिकिटे विकण्यासाठी धडपडत आहेत. यामागचे सर्वात मोठे कारण तिकिटांचे चढे दर असल्याचे सांगितले जात आहे.
८.५ लाख रुपयांपर्यंतचे तिकीट
भारत-पाकिस्तान सामन्याचे सामान्य तिकीट किंमत ३०० डॉलर (रु. २५ हजार) आहे तर प्रीमियम तिकिटाची किंमत $२,५०० ते $१०,००० (रु. २ लाख ते ८.५ लाख) दरम्यान आहे.
न्यूयॉर्कमध्ये राहणाऱ्या दक्षिण आशियाई समुदायासाठी ही किंमत खूप जास्त आहे. युनायटेड स्टेट्समध्ये राहणारे आणि अमेरिकन क्रिकेटचे वार्तांकन करणारे पत्रकार पीटर डी ला पेन्ना यांनी नुकत्याच केलेल्या ट्विटमध्ये सांगितले की, “एका सामन्यासाठी $३५० देऊनही, त्यांना भर उन्हात प्रीमियम सीटवर जागा मिळाली. प्रीमियम सीटवर बसण्याची जागाही नाही. तिकीट धोरणातील अपारदर्शकता आणि काळाबाजार हेही रसिकांचा उत्साह कमी होण्याचे प्रमुख कारण आहे”.
तिकिटांचा काळाबाजार होत आहे
भारत आणि पाकिस्तान यांच्यातील या सामन्याची सामान्य प्रवेश तिकिटे आधीच विकली गेली आहेत, त्यामुळे सध्या त्यांचा काळा बाजार चालू आहे जो $३०० ते $१,२०० ते $१,४०० वर पोहोचला आहे. अशा परिस्थितीत फार कमी लोक मैदानावर येऊन खेळाचा आनंद लुटताना दिसतील अशी शक्यता आहे.
मीडिया रिपोर्ट्सनुसार, युनायटेड स्टेट्समधील कमी उत्पन्न असलेल्या आशियाई कुटुंबांचे सरासरी मासिक उत्पन्न $२,६२५ आहे आणि मध्यम-उत्पन्न कुटुंबांचे सरासरी मासिक उत्पन्न $९,३०० आहे.
अशा परिस्थितीत ते प्रीमियम तिकीट खरेदी करण्यासाठी पैसे खर्च करतील अशी अपेक्षा करणे चुकीचे ठरेल.
याशिवाय, स्पर्धेतील पहिले १० सामने लो स्कोअरिंगचे झाले. त्यामुळेही चाहते स्टेडियमवर येऊन सामना पाहण्यास उत्सुक नाहीत.
पार्किंग शुल्क एक लाख रुपये
सामना पाहण्यासाठी जाणाऱ्या चाहत्यांना त्यांची वाहने पार्क करण्यासाठी पार्किंगची जागा लागेल, हे उघड आहे, अशा परिस्थितीत ब्लॉकबस्टर सामन्याच्या पार्श्वभूमीवर, भारत विरुद्ध पाकिस्तान सामन्यासाठी पार्किंग क्षेत्र शुल्क वाढविण्यात आली आहे. माजी क्रिकेटपटू आणि प्रसिद्ध समालोचक नवज्योत सिंग सिद्धू यांनी भारत आणि आयर्लंड यांच्यातील सामन्यादरम्यान ऑन एअर सांगितले होते की, चाहत्यांना पार्किंगसाठी १२०० डॉलर (सुमारे १ लाख रुपये) द्यावे लागतील. सिद्धू यांच्या म्हणण्यानुसार, त्यांच्या ड्रायव्हरने त्यांना हे सांगितले.
