Ind vs Aus Weather : भारत-ऑस्ट्रेलिया सामन्यात पाऊस येणार? सामना रद्द झाल्यास सेमी फायनलचा नियम काय? जाणून घ्या
India Vs Australia Weather Forecast : भारतीय संघाने हा सामना जिंकल्यास उपांत्य फेरीसाठी पात्र ठरेल तर ऑस्ट्रेलियाचा मार्ग कठीण होईल. मात्र, या सामन्यापूर्वी हवामानाबाबत एक वाईट बातमी येत आहे.
टी-20 वर्ल्डकप २०२४ मध्ये सोमवारी (२३ जून) भारत आणि ऑस्ट्रेलिया आमनेसामने येणार आहेत. सुपर ८ फेरीचा हा सामना सेंट लुसिया येथील ग्रोस आयलेट डॅरेन सॅमी नॅशनल क्रिकेट स्टेडियमवर होणार आहे. भारतीय वेळेनुसार रात्री ८ वाजता सुरू होणारा हा सामना दोन्ही संघांसाठी निर्णायक आहे.
भारतीय संघाने हा सामना जिंकल्यास उपांत्य फेरीसाठी पात्र ठरेल तर ऑस्ट्रेलियाचा मार्ग कठीण होईल. मात्र, या सामन्यापूर्वी हवामानाबाबत एक वाईट बातमी येत आहे.
वास्तविक, भारत आणि ऑस्ट्रेलिया यांच्यातील सामना ग्रोस आयलेटच्या स्थानिक वेळेनुसार सकाळी १०:३० वाजता सुरू होईल. हवामान अंदाजानुसार, सकाळी ग्रोस आयलेटचे आकाश गडद, दाट ढगांनी वेढलेले असेल.
तसेच, सोमवारी सकाळी पावसाची ५५ टक्के शक्यता आहे. आकाश दाट ढगाळ राहण्याची शक्यता आहे. टी-20 विश्वचषकाच्या ग्रुप स्टेजमध्येही पावसामुळे अनेक सामन्यांवर परिणाम झाला होता. तापमानाबाबत बोलायचे झाले तर दिवसभरात ३२ अंश राहण्याची शक्यता आहे. याशिवाय येथे भरपूर आर्द्रताही असेल. अशा परिस्थितीत भारत आणि ऑस्ट्रेलिया यांच्यातील सामन्यात पावसामुळे व्यत्यय येण्याची शक्यता आहे.
पावसामुळे सामना रद्द झाल्यास फायदा कोणाला?
अफगाणिस्तान आणि ऑस्ट्रेलिया यांच्यातील सामन्यात अपसेट झाल्यानंतर आता ग्रुप-१ मधील उपांत्य फेरीची लढत रोमांचक बनली आहे. अशा परिस्थितीत या गटातील कोणता संघ प्रथम उपांत्य फेरीत स्थान मिळवणार हे भारत आणि ऑस्ट्रेलिया यांच्यातील सामना ठरवेल.
मात्र, भारत आणि ऑस्ट्रेलिया यांच्यातील सामना पावसामुळे रद्द झाल्यास दोन्ही संघांमध्ये प्रत्येकी १ गुण विभागला जाईल. भारताने सुपर-८ मधील दोन सामने जिंकले असून त्यांचे ४ गुण आहेत. अशाप्रकारे रोहित शर्माचा संघ ५ गुणांसह उपांत्य फेरीत पोहोचेल.
गट एक मधील सेमी फायनलचा दुसरा संघ कोण असेल, हे पाहण्यासाठी अफगाणिस्तान आणि बांगलादेश सामन्याच्या निकालाची प्रतिक्षा करावी लागेल.
संबंधित बातम्या