BGT News : टीम इंडियासाठी घातक ठरू शकतो हा खेळाडू! ऑस्ट्रेलियानं अचानक कसोटी संघात स्थान दिलेला ब्यू वेबस्टर आहे कोण?

ऑस्ट्रेलियाच्या सर्वात आश्वासक क्रिकेटपटूंपैकी एक म्हणून ३० वर्षीय वेबस्टर अलीकडच्या काळात पुढं आला आहे. त्याला पहिल्यांदाच कसोटी पदार्पणाची मिळणार आहे. वेबस्टरला त्याच्या देशांतर्गत कामगिरीच्या जोरावर संघात स्थान मिळालं आहे. एक अष्टपैलू म्हणून तो संघात चांगली भूमिका बजावू शकतो.

इतिहासात कोरलं गेलंय नाव

कसोटी पदार्पणाच्या आधीच ब्यू वेबस्टरचं नाव क्रिकेट विश्वात गाजत आहेत. वेस्ट इंडिजचे दिग्गज सर गॅरी सोबर्स यांच्यानंतर एकाच मोसमात ९०० धावा आणि ३० विकेट्स घेण्याचा विलक्षण पराक्रम करणारा त्यानं केला आहे. शेफिल्ड शील्डच्या १३२ वर्षांच्या इतिहासात अशी कामगिरी करणारा तो दुसरा खेळाडू ठरला आहे. गॅरी सोबर्स यांना क्रिकेटमधील महान अष्टपैलू खेळाडूंपैकी एक मानलं जातं. त्यामुळं वेबस्टरची ही कामगिरी जास्त महत्त्वाची ठरते.

हेही वाचा: लियाम लिव्हिंगस्टोनसाठी आरसीबीनं मोजले ८.७५ कोटी! या खेळाडूमध्ये असं आहे काय?

‘मॅच विनर’ म्हणून निर्माण केलीय ओळख

वेबस्टरची अष्टपैलू कामगिरी टास्मानियासाठी महत्त्वाची ठरली आहे. २०२४-२५ च्या शेफिल्ड शील्ड मोसमात त्यानं आपण मॅच विनर असल्याचं दाखवून दिलं होतं. न्यू साऊथ वेल्सविरुद्ध खेळताना दोन महत्त्वपूर्ण बळी घेत त्यानं टास्मानियाचा पहिला विजय निश्चित केला. यंदाच्या उन्हाळ्यात त्यानं ५६ च्या सरासरीनं ४४८ धावा काढल्या आहेत. त्यात १६ बळींचाही समावेश आहे.

भारत अ संघाविरुद्ध वेबस्टरची कामगिरीही शानदार होती, आता त्याला अ‍ॅडलेड कसोटीत पदार्पणाची संधी मिळते का, हे पाहणं औत्सुक्याचं ठरणार आहे. 

हेही वाचा : कायरन पोलार्डच्या अतरंगी शॉटची क्रिकेट विश्वात चर्चा, तुम्ही पाहिला का?

असा आहे ऑस्ट्रेलिया संघ

पॅट कमिन्स (कर्णधार), स्कॉट बोलंड, अ‍ॅलेक्स कॅरी (यष्टीरक्षक), जोश हेजलवूड, ट्रॅव्हिस हेड, जोश इंगलिस, उस्मान ख्वाजा, मार्नस लाबुशेन, नॅथन लायन, मिचेल मार्श, नॅथन मॅकस्वीनी, स्टीव्ह स्मिथ, मिशेल स्टार्क, ब्यु वेबस्टर