WI vs ENG Highlights : एव्हिन लुईसच्या वादळात इंग्लिश संघ उडाला, पहिल्या सामन्यात इंग्लंडचा धुव्वा

इंग्लंडने वेस्ट इंडिजसमोर विजयासाठी २१० धावांचे लक्ष्य ठेवले होते, पावसामुळे सामना थांबेपर्यंत एव्हिन लुईसच्या वादळी खेळीच्या जोरावर यजमानसंघाने २५.५ षटकांत २ गडी गमावून १५७ धावा केल्या होत्या. हा सामना वेस्ट इंडिजने डीएलएस नियमाच्या आधारे ८ गडी राखून जिंकला. एव्हिन लुईसने ६९ चेंडूत ८ षटकारांच्या मदतीने ९४ धावांची तुफानी खेळी केली, तो अवघ्या ६ धावांनी शतकापासून वंचित राहिला.

तत्पूर्वी, या सामन्यात नाणेफेक गमावल्यानंतर प्रथम फलंदाजीसाठी उतरलेल्या इंग्लंडने चांगली सुरुवात केली. टॉप ऑर्डरच्या फलंदाजांना सुरुवात मिळाली पण त्यांना या सुरुवातीचे रुपांतर मोठ्या डावात करता आले नाही. १०० धावांच्या आत ४ गडी गमावल्यानंतर कर्णधार लियाम लिव्हिंगस्टोन (४८) आणि सॅम करन (३७) यांनी काही काळ संघाची धुरा सांभाळली, पण ते बाद होताच संघ २०९ धावांवर आटोपला. इंग्लंडचे फलंदाज पूर्ण ५० षटकेही टिकू शकले नाहीत.

यानंतर २१० धावांच्या लक्ष्याचा पाठलाग करताना वेस्ट इंडिज संघाने ब्रँडन किंग (३०) आणि एव्हिन लुईस यांच्या जोडीने धडाकेबाज सुरुवात केली. पहिल्या विकेटसाठी दोघांनी १९.१ षटकांत ११८ धावा जोडल्या. सुरुवातीच्या फटकेबाजीमुळे वेस्ट इंडिजचा विजय निश्चित झाला होता. लुईस २३ व्या षटकात बाद झाला. यानंतर कीसी कार्टी आणि कर्णधार शाई होप यांनी वेस्ट इंडिजला विजय मिळवून दिला. गुडकेश मोतीला त्याच्या उत्कृष्ट कामगिरीबद्दल सामनावीर पुरस्काराने गौरविण्यात आले. मालिकेतील दुसरा सामना याच मैदानावर २ नोव्हेंबररोजी खेळला जाणार आहे.